Зеленский Твер вилоятидаги авиаҳалокатга Украинанинг алоқаси йўқлигини айтди. Ушбу ҳалокатда 24 июнда Россияда қўзғолон кўтарган Евгений Пригожин ўлгани маълум қилинган. 

Зеленский Португалия раҳбари билан бўлиб ўтган матбуот анжуманида воқеа ҳақида гапирди.

«Украина ҳаво кемалари борасида дунё давлатларига мурожаат қилганда, биз буни назарда тутмагандик. 

Биринчидан, бу ҳолатга бизнинг ҳеч қандай алоқамиз йўқ, бу аниқ. Ўйлайманки, воқеага ким алоқадорлигидан ҳамма хабардор», — деди Украина президенти.

Катта эҳтимол билан Зеленский Россия раҳбари Владимир Путиннинг ушбу ҳалокатга алоқаси борлигига шаъма қилган. 

Таъкидланишича, ғалаён кўтаришга журъат қилган Пригожин Путиннинг марҳамати билангина тирик эканига Россия элитасининг ишончи комил бўлган.

Пригожин парвоз қилаётган самолёт қай сабабга кўра ҳалокатга учрагани борасида Россия расмий идоралари якуний хулоса эълон қилганича йўқ. Ҳолатни махсус комиссия ўрганади.

Ҳарбий исён ортидан «Вагнер» хўжайинига ўлим ҳукми ўқилгани ҳақидаги фараз аввалроқ ўртага чиққан эди.