Наримон Жалил Украинанинг Туркиядаги фавқулодда ва мухтор элчиси этиб тайинланди. Бу ҳақда президент Владимир Зеленскийнинг 305-сонли фармони қабул қилинди.

Россия билан тинчлик музокараларида Туркия воситачилик қилаётгани инобатга олинса, айни вақтда Украинанинг Анқарадаги элчиси лавозими ҳар қачонгидан ҳам муҳимроқ аҳамият касб этади.

Қрим татари миллатига мансуб сиёсатчи, журналист ва инсон ҳуқуқлари ҳимоячиси Наримон Жалил Ўзбекистонга бегона эмас. У 1980 йилда Навоий шаҳрида туғилган.

1944 йил 18 май тунида шўро доҳийси Иосиф Сталиннинг фармони билан 250 мингдан зиёд қрим татарлари ватанидан бадарға қилинган эди.

Инсоният тарихидаги энг мудҳиш амалиётларидан бири саналган сургун пайти Наримон Жалилнинг яқинлари ҳам Ўзбекистондан қўним топган.

Илк болалик даври мамлакатимизда кечган Наримон 1989 йили оиласи билан тарихий ватани Қримга қайтган.

Одесса миллий университетини сиёсатшунослик йўналишида тамомлаб, журналистлик ва педагоглик билан шуғулланган. 2013 йилда Қрим татар Мажлиси раиси ўринбосари этиб сайланган.

2014 йилда Қрим ярим ороли Россия томонидан ишғол қилинганидан кейин ҳам Наримон Жалил шу ерда қолиб, украин ва қрим татарлари ҳақ-ҳуқуқларини ҳимоя қилган.

2021 йил сентябрь ойида “Қрим платформаси” саммитида қатнашганидан кейин Россия ҳуқуқ-тартибот идоралари томонидан диверсияда айбланиб қўлга олинган. 2022 йилда 17 йилга озодликдан маҳрум этилган. 2024 йил июнь ойида Россия ва Украина ўртасидаги асирлар алмашуви доирасида озодликка чиққан ва Украинага қайтган. 

Эслатиб ўтамиз, 2023 йилнинг сентябрь ойида президент В.Зеленский Самарқанд вилоятида туғилган Рустем Умеровни ҳам Украинанинг мудофаа вазири этиб тайинлаган эди.

Қрим татарларининг миллий манфаатларини ҳимоя қилиш ҳаракатида Ўзбекистонда узоқ йил яшаган Мустафо Жамилов алоҳида ўрин тутади. Сиёсий етакчи бу борадаги саъй-ҳаракатлари учун Нобель мукофотига ҳам номзод қилиб кўрсатилган.