Россия президенти матбуот котиби Дмитрий Песковнинг маълум қилишича, Россия ва Украина делегациялари ўртасида тўғридан-тўғри музокаралар орқали муайян натижаларга эришилгандагина, давлат раҳбарлари даражасидаги учрашув мавзусига қайтиш мумкин бўлади.

У, шунингдек, Москва Россия ва Украина меморандумлари лойиҳалари Истанбулдаги музокараларнинг иккинчи босқичида муҳокама қилинишини кутаётгани ҳамда Украинани тартибга солиш бўйича Россия меморандуми лойиҳаси тафсилотлари ошкор этилмаслигини маълум қилди.

Песков, шунингдек, Эрдўғaн Россия, АҚШ ва Украина президентларини қабул қилишга тайёрлиги борасидаги Туркия ТИВ баёнотига ҳам изоҳ бериб ўтди.

Кремл расмийсининг таъкидлашича, Путин Зеленский ва Трамп билан шахсий учрашув имкониятини қўллаб-қувватлайди: бундай алоқалар албатта керак, бироқ бу учун яхши тайёргарлик ҳам зарур.

«Президент Путин бир неча марта олий даражадаги алоқалар тарафдори эканлигини ва улар, шубҳасиз, зарурлигини таъкидлаган. Бироқ, ушбу ҳолатда яхши тайёрланиш ва аввало давлат делегациялари ўртасидаги бевосита музокараларда натижага эришилиши лозим. Шундан сўнг, агар ва қачонки бундай натижага эришилса, албатта, олий даражадаги учрашув ҳақида сўз юритиш мумкин бўлади», – дея таъкидлади Песков.