Ўзбекистон Республикаси Вазирлар Маҳкамасининг 2019 йил 8 октябрдаги қарори билан Баҳодир Мажидович Аҳмедов Вазирлар Маҳкамасининг Ёшлар сиёсати, маданият, маънавият, оммавий ахборот воситалари, ижодий ва жамоат ташкилотлари масалалари котибиятининг раҳбари этиб тайинланди. Бу ҳақда ЎзА хабар берди.

Баҳодир Аҳмедов айни пайтда Вазирлар Маҳкамаси Ижтимоий ривожлантириш масалалари котибиятининг Ижтимоий ҳимоя соҳасидаги ислоҳотлар таҳлили ва мониторинги бўйича бош мутахассиси лавозимида ишлаб келаётган эди.

Б.Аҳмедов 1973 йилда Тошкент шаҳрида туғилган. Ҳозирга қадар Олмазор тумани маданият ва спорт ишлари бўлими мудири, Тошкент шаҳар маданият ва спорт ишлари бош бошқармаси бошлиғи ўринбосари, Тошкент вилоят маданият ва спорт ишлари бошқармаси бошлиғи, Маданият ва спорт ишлари вазирининг ўринбосари, Касаба уюшмалари федерацияси кенгаши раиси ўринбосари, Маданият ва спорт ишлари вазири, Тошкент вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари каби масъулиятли лавозимларда ишлаган.

Б.Аҳмедов яқинда Ўзбекистон Республикаси Президентининг маслаҳатчиси ўринбосари этиб тайинланган Абдурашид Жўрабоевнинг ўрнини эгаллади.