Самарқанд шаҳар прокурори Дилмурод Сайидқулов бошқа ишга ўтганлиги муносабати билан айни пайтгача Самарқанд шаҳри ҳокими вазифасида фаолият юритган Бобурмирзо Облақулов Самарқанд шаҳар прокурори вазифасига тайинланди. Бу ҳақда Самарқанд шаҳар ҳокимлиги ахборот хизмати хабар берди.

Кеча, 17 февраль куни Бобурмирзо Облақулов ўз аризасига биноан Самарқанд шаҳар ҳокими лавозимидан озод этилганди. Айни пайтда ушбу лавозимда Фазлиддин Умаров фаолият юритмоқда.

Эслатиб ўтамиз, 2019 йилнинг 25 май куни Халқ депутатлари Самарқанд шаҳар кенгашининг навбатдан ташқари сессиясида ташкилий масала кўрилган, Самарқанд шаҳар прокурори вазифасида ишлаб келган Облақулов Бобурмирзо Саломович Самарқанд шаҳар ҳокими вазифасини бажарувчи лавозимига тасдиқланганди.

Бобурмирзо Облақулов 1972 йил Каттақўрғон туманида туғилган. Самарқанд шаҳар прокурорлиги ва ҳокимлигидан олдин Ўзбекистон Республикаси Бош прокуратураси, Самарқанд вилоят прокуратурасида фаолият кўрсатган, Пастдарғом, Оқдарё туманларида прокурор лавозимида ишлаган.