Жорий йилнинг 30 ноябридан 2 декабрига қадар пойтахтимизда Open Data Challenge-2018 (Хакатон) — очиқ маълумотлардан фойдаланган ҳолда иловалар ишлаб чиқиш бўйича анъанавий танлов бўлиб ўтади. Бу ҳақда АКТ вазирлиги ахборот хизмати хабар берди.

Танлов Ўзбекистон Республикаси Ахборот технологиялари ва коммуникацияларини ривожлантириш вазирлиги ташаббуси ва қўллаб-қувватлаши остида «Электрон ҳукумат» тизимини ривожлантириш маркази, Тошкент шаҳридаги Инҳа университети, ЕХҲТнинг Ўзбекистондаги лойиҳалари кординатори, БМТ Тараққиёт дастурининг Ўзбекистондаги вакиллиги, Жаҳон банкининг Тошкентдаги вакиллиги томонидан ташкил қилинмоқда.

Танлов ҳамкорлари – «UZINFOCOM» МЧЖ ягона интегратори, «Xabar» газетаси ва «ICT News», «InfoCOM.UZ» журналлари.

Open Data Challenge танловида иштирокчилар очиқ маълумотлардан фойдаланиб, аниқ белгилаб берилган муддат ичида абстракт ғояларни янги веб ёки мобиль хизматларнинг тажриба намуналарига ёки альфа-кўринишларига келтиришади.

Уч кун давомида Open Data Challenge-2018 иштирокчилари жамиятнинг барча жабҳалари – молия, транспорт, таълим, ахборот технологиялари, соғлиқни сақлаш, экология ва бошқа йўналишларда фойдали бўлган янги лойиҳаларни тақдим этадилар.

Open Data Challenge-2018 танловида иштирок этиш бепул. Фақатгина қатнашчилар рўйхатдан ўтиши талаб этилади. Ташкилотчилар иштирокчиларни интернет билан таъминлаб, ишлаш учун қулай шароит яратиб беришади.

Хакатон натижалари бўйича қуйидаги номинацияларда ғолиб ва совриндорлар аниқланади.

1. «Ақлли шаҳар» учун очиқ маълумотларга асосланган энг яхши лойиҳа (мобиль ёки веб-илова);
2. Очиқ маълумотларга асосланган энг яхши бизнес лойиҳа (мобиль ёки веб-илова);
3. Очиқ маълумотларни генерациялаш (трансформациялаш) буйича энг яхши лойиҳа (мобиль ёки веб-илова).

Шундай қилиб, мобиль ва веб-иловалар тадбирнинг моддий маҳсули бўлади. Лойиҳаларни ишлаб чиқишдан ташқари, Хакатон доирасида дастурчилар учун очиқ маълумотлар билан ишлашга оид тренинглар бўлиб ўтади.

Хакатон натижаларига кўра биринчи, иккинчи ва учинчи ўринни олган иштирокчилар қимматбаҳо совринлар билан тақдирланади.

Бу йилги танловда Гран-при ҳам кўзда тутилган – энг яхши деб топилган жамоа Мадрид шаҳридаги (Испания) Халқаро конференцияга йўлланма олади. Гран-при соҳиби Эксперт ҳакамлар томонидан уч йўналишда биринчи ўринни олганлар орасидан танлаб олинади.

Танловда иштирок этиш учун қуйидаги ҳавола бўйича рўйхатдан ўтиш лозим: https://data.gov.uz/ru/challenge/register.

Шуниндек, Facebook тармоғидаги https://www.facebook.com/OpenDataChallenge/ саҳифасида ҳам керакли маълумотлар тақдим этилган.

Тадбир ўтказиладиган саналар:

Рўйхатга олиш – 25 ноябргача.

Open Data Challenge 2018 тренинглар в конференция куни – 30 ноябрь.

Open Data Challenge 2018 Хакатон кунлари – 1-2 декабрь.

Тақдимотлар ва ғолибларни аниқлаш – 2 декабрь.

Ғолибларни тақдирлаш маросими – 7 декабрь.

Ўтказилиш жойи: Тошкентдаги Инҳа университети (Мирзо Улуғбек тумани, Зиёлилар кўчаси, 9)