Фавқулодда вазиятлар бошқармаси ахборот хизмати раҳбари Миржон Файзуллоевнинг «Xabar.uz»га маълум қилишича, Бухорода содир бўлган ёнғинда савдо мажмуасининг 250 кв.м. майдони ёниб кетган.

Бугун, 7 январь куни соат 05:20 да Ғиждувон тумани, «Дегрезон» маҳалласи, Дегрезон кўчасида жойлашган савдо мажмуасида ёнғин содир бўлган.

Ёнғинни бартараф этиш учун 8 та ёнғин-қутқарув экипажи жалб қилинган. Соат 05:23 да воқеа жойига етиб бориб, ҳудуд соат 05:45 гача қуршаб олинган. Ва ёнғин соат 07:50 да тўлиқ бартараф этилган.

Бухоро вилояти Фавқулодда вазиятлар бошқармаси ахборот хизмати раҳбари Миржон Файзуллоев хабар эълон қилинаётган вақтда, Ғиждувонда содир бўлган ёнғин ҳолати бартараф этилгач, ёниб кетган ҳудуд 400 метр квадрат майдондан иборат эканини билдирди.

"Кучли ёнғин оқибатларини бартараф этиш жараёнида бирламчи ҳолатга, 250 метр квадрат майдон, дея тахмин қилинган эди. Бироқ, чангли ва бурқсиган тутун, устига-устак оловнинг баландлиги ёнғин забт этаётган майдон ҳудудини аниқлашда ҳалал берган",-деди Миржон Файзуллоев.

Айни дамда Фавқулодда вазиятлар бошқармаси экспертиза вакиллари ҳудудда ёнғин оқибатларини ўрганмоқда.