Шофиркон туманининг Шавқувот қишлоғида яшовчи А.А. 50 ёшида 15 йилга «кесилди». Бу ҳақда «Xabar.uz»га маълум қилган Жиноят ишлари бўйича Шофиркон тумани суди раиси Бахтиёр Саъдуллаевнинг маълум қилишича, айбдор маънавий зарарни ундиришдан қутилиш ҳамда мевазорга эга бўлиш учун шундай қабиҳ ишга қўл урган.

Суд ҳужжатларига кўра, А.А. қасддан одам ўлдиришга суиқасд қилиш жиноятини содир этган. У олдиндан ўзаро келишмовчилиги бўлган қўшни қишлоқда яшовчи маҳалладоши Ў.Т. фойдасига вилоят суди апелляция инстанцияси қарори билан ундирилиши белгиланган 5 000 000 сўм миқдоридаги маънавий зарарни тўлашдан қутулиш ҳамда Ў.Т.га тегишли 0,7 гектар мевазорга эгалик ҳуқуқини уни ўлдириш орқали қўлга киритиш мақсадини кўзлаган.

Ўзининг жиноий режасини амалга оширишга қулай пайт пойлаган. Ў.Т.нинг тахминан соат 00:30 ларда маҳалланинг Региён қишлоғида жойлашган тунги клубда эканини эшитиб, шу манзилга борган. Тунги клубда шовқин-сурон ва ҳамма мижозлар ўзи билан ўзи овора бир пайтда А.А. фуқаро Ў.Т.га тўсатдан ташланган. Ўзи билан олиб келган ошхона пичоғини унинг қорин қисмига бир маротаба зарб билан урган. Атрофдагиларнинг эътиборини тортган воқеа ҳаммани сергаклантирган ва бошқа шахсларнинг аралашуви сабабли А.А. олдидан режалаштирган жиноятини ўзига боғлиқ бўлмаган ҳолда охирига етказа олмаган. Судга оид тиббий экспертиза хулосасига кўра, Ў.Т.га ҳаёт учун хавфли бўлган оғир тан жароҳати етказган.

Суд мажлисида А.А. айбини тўлиқ тан олган. Қилмишидан пушаймонлигини билдирган. Қонуний енгиллик беришни сўраган. Бироқ, суд олиб борилган тергов ҳаракатлари давомида жавобгарликни енгиллаштириш учун келдирилган важларни рад қилишни лозим топган. Ва унга жиноий қилмиши учун қонун санкцияси доирасида озодликдан маҳрум қилиш жазоси тайинлаган.

А.А. Ўзбекистон Республикаси Жиноят кодексининг 25- (Жиноятга тайёргарлик кўриш ва жиноят содир этишга суиқасд қилиш), 97-моддаси (Қасддан одам ўлдириш), 2-қисми, «и» (тамагирлик ниятида)да назарда тутилган жиноятини содир қилганликда айбли, деб топилган ва унга шу модда билан 15 йил озодликдан маҳрум қилиш жазоси тайинланган.

Айбдор жазони умумий тартибли колонияларда ўтайдиган бўлди.