11-13 март кунлари Ўзбекистонда дастурлаш ва IТ технологиялари йўналишида таҳсил олувчи ёшларни бирлаштирган ASTRUMHACK 2022 ҳакатони бўлиб ўтади. Улар янги рақамли маҳсулотни яратиш учун рақобатбардош вазифани бажаришлари керак бўлади. Ғолиблар 45 миллион сўм мукофот жамғармасини ўзаро тақсимлайдилар. Тадбир Astrum IT Академияси томонидан IT PARK Uzbekistan, Beeline Uzbekistan дижитал оператор билан биргаликда VEON телекоммуникация холдинги кўмагида ташкил этилди.

Ҳакатонда 24 ёшгача бўлган ёшлар якка тартибда ёки жамоа бўлиб (максимал уч киши) иштирок этишлари мумкин. ASTRUMHACK 2022’да улар соғлиқни сақлаш, саёҳат ва туризм, молия, экология, қишлоқ хўжалиги ва инсон ресурслари соҳаларида бизнес муаммоларини ҳал қила олувчи рақамли маҳсулотларни ишлаб чиқадилар. Алоҳида топшириқни ҳакатон ташкилотчиси, ҳудудда тадбир ўтказиладиган Astrum IТ академияси тақдим этади.

Ғолибларга пул мукофотлари топширилади. Биринчи ўрин эгасига 20 миллион сўм, иккинчи ўринга 15 миллион, учинчи ўринга 10 миллион сўм пул мукофоти берилади. Ғолиб жамоа Beeline Uzbekistan’нинг махсус совғасига ҳам эга бўлади. Ёшлар учун номоддий рағбат сифатида ишчи рақамли маҳсулотларни яратишда машқ қилиш ва мутахассислар, шу жумладан VEON компаниялар гуруҳи вакиллари билан мулоқот қилиш имконияти тақдим этилади.

«Astrum IТ Академияси Марказий Осиёдаги энг йирик академия бўлиб, тез орада талабалар сони бўйича ҳам энг йирик академияга айланади. Бугун биз талабаларимиз ва бутун IТ ҳамжамиятининг ҳаётини янада қизиқарли қилиш учун барча йўналишларда ишламоқдамиз. Бунинг учун Ўзбекистон ва хориждаги етакчи IТ-компанияларни ҳамкорликка жалб қиламиз. VEON телекоммуникация холдинги Beeline Uzbekistan билан биргаликда ўқув жараёнининг кўплаб йўналишларида бизни қўллаб-қувватлаш ва самарали ҳамкорлик қилишга тайёрлигини билдирганидан жуда мамнунмиз. Умид қиламизки, бу ҳамкорлик давом этади ва янги сифат босқичига чиқади», — деди Astrum IТ Академияси асосчиси Ботир Арифжонов.

«Биз Ўзбекистоннинг рақамли иқтисодиёти учун кадрлар тайёрлашга қаратилган қатор таълим лойиҳаларини қўллаб-қувватлаймиз. Шу сабабли, ҳакатон ўтказиш ғояси иштиёқ билан кутиб олинди. Ёшлар учун бу IT соҳасида илк муваффақиятли қадамларни қўйиш, билимларини қўллаш ва, албатта, мукофотлар олиш учун ажойиб имкониятдир. Ушбу тадбира улар учун касбнинг муваффақиятли бошланиши бўлишини тилайман!» – дея воқеани шарҳлади Beeline Uzbekistan бош директори Анджей Малиновски.

ASTRUMHACK 2022 ҳакатонида иштирок этиш учун https://form.astrum.uz/hack/ ҳаволаси орқали рўйхатдан ўтишингиз мумкин. Рўйхатдан ўтиш 8 мартгача давом этади.