22 май куни Тошкентда GSMA ташкилотининг M360 Eurasia 2025 саммити муваффақиятли якунига етди. Бу саммит Марказий Осиёда илк бор ўтказилди. Ўзбекистон Рақамли технологиялар вазирлиги, Beeline Uzbekistan ва VEON Group томонидан қўллаб-қувватланган ушбу муҳим тадбир бутун Евроосиё бўйлаб глобал мобил алоқа ва технология соҳаларининг нуфузли раҳбарлари, сиёсатчилар, инвесторлар ҳамда соҳа мутахассисларини бир жойга тўплади. Жами 60 мамлакатдан 1000 дан ортиқ иштирокчи қатнашган бу тадбир Ўзбекистоннинг минтақавий технологиялар маркази ва Марказий Осиё учун рақамли кўприк сифатидаги мавқеи тез суръатлар билан ўсиб бораётганини яққол намоён этди.

M360 Eurasia 2025 минтақа бўйлаб рақамли трансформацияни тезлаштириш бўйича стратегик платформа вазифасини ўтайди. Унда асосий эътибор рақамли тафовутни бартараф этишга қаратилди, чунки бу 2030-йилга келиб минтақа учун 415 миллиард АҚШ доллари миқдорида ЯИМни очиш имкониятини беради. Кун тартибида рақамли ривожланиш келажагини шакллантирувчи асосий йўналишлар акс эттирилди: мобил тармоқларда кенгайтирилган сунъий интеллектни жорий этиш, 5G тармоғини кенг қамровли татбиқ этиш, барқарор ва кенгайтириладиган технологик экотизимларни яратиш, тармоқлараро рақамли ечимлар ва маълумотларни бошқаришнинг мустаҳкам асосларини ишлаб чиқиш. GSMA башоратларига кўра, 2030-йилга келиб 5G Евроосиё минтақасидаги барча мобил алоқаларнинг 40 фоиздан ортиғини ташкил этади, бу эса мазкур мавзуларнинг ғоят муҳимлигини кўрсатади. Маълумотлар марказлари ва GSMA Open Gateway ташаббуси — операторлар ва дастурчилар учун стандартлаштирилган, глобал API тизимини яратишга мўлжалланган лойиҳа — ўрганилган асосий мавзулар қаторига кирди.

«Тошкентда илк бор M360 Eurasia 2025 форумни ўтказиш Ўзбекистон учун шараф ва бизнинг улкан рақамли режаларимизнинг эътирофидир. Ушбу глобал тадбир муваффақияти Ўзбекистон Президентининг мамлакатни минтақавий IT-марказга айлантириш бўйича узоқни кўзлаган ёндашувини акс эттирувчи «Рақамли Ўзбекистон - 2030» стратегиясини амалга оширишда тўғри йўлдан бораётганимизни тасдиқлади. Ушбу форумни муваффақиятли ўтказиш орқали Ўзбекистон инновацияларни олға суриши ва бутун Марказий Осиё учун рақамли ўсишни рағбатлантирадиган ҳамкорлик майдонига айланишга тайёрлигини исботлади», — деди Ўзбекистон Республикаси Рақамли технологиялар вазири Шерзод Шерматов.

«Тошкентда M360 Eurasia 2025 муваффақиятли ўтказилиши ҳукумат, бизнес ва халқаро ҳамжамиятнинг биргаликдаги саъй-ҳаракатлари инновациялар ва барқарор ривожланиш учун қандай кучли туртки бериши мумкинлигини кўрсатди. Ўзбекистон рақамли соҳанинг бутун салоҳиятини рўёбга чиқаришга тайёрлигини яққол намоён этди ва Тошкент, шубҳасиз, жаҳон рақамли харитасида муҳим нуқта бўлиб қолади», — деди GSMA бош директори Вивек Бадринат.

«Тошкентда ўтказилган M360 Eurasia 2025 Евроосиёнинг рақамли ўзгаришлар учун улкан имкониятларга эга минтақа эканлигини яққол намоён этди. VEON учун бу илғор технологияларга сармоя киритиш ва фойдаланувчиларга ҳар куни 1440 дақиқа долзарб бўлган боғланган рақамли хизматларни тақдим этувчи рақамли экотизимларни яратиш муҳимлигини таъкидлаш имконияти бўлди. Биз шундай тадбир ҳамкори бўлишдан ва минтақанинг рақамли ўзгаришига ҳисса қўшишни давом эттиришдан мамнунмиз», — дея таъкидлади VEON Group бош директори Каан Терзиоглу.

«Биз Тошкентда шундай нуфузли халқаро аудиторияни тўплаганимиздан фахрланамиз. Ушбу форум Ўзбекистон рақамли ўзгаришлар йўлида шиддат билан илгарилаб бораётганини яна бир бор кўрсатди. Ишончимиз комилки, бу ерда туғилган ғоялар ва алоқалар янги имкониятлар, инвестициялар ва инновациялар учун пойдевор бўлиб хизмат қилади ҳамда мамлакатиимизнинг рақамли келажакдаги етакчи мавқеини янада мустаҳкамлайди», — деди Beeline Uzbekistan бош директори Андрей Пятахин.

Шунингдек, форум доирасида рақамли инфратузилмани ривожлантириш, трансчегаравий ҳамкорликни мустаҳкамлаш ва бутун минтақа бўйлаб технологик тараққиётни жадаллаштириш мақсадида кўплаб шартномалар имзоланди.

GSMA томонидан Тошкентда ташкил этилган M360 Eurasia 2025 Евроосиёда рақамли ҳамкорликни ривожлантиришда муҳим босқич бўлди. Ўзбекистон халқаро технологик мулоқот учун самарали майдон бўлиб хизмат қилишга, ҳамкорлик ва тараққиёт учун янги имкониятлар очишга қодир эканлигини яна бир бор исботлади.

GSMA ҳақида

GSMA — бу ижобий бизнес муҳити ва жамиятдаги ўзгаришларга асос бўлувчи инновацияларни кашф этиш, ривожлантириш ва жорий этиш мақсадида мобил экотизимни бирлаштирувчи глобал ташкилотдир. Бизнинг мақсадимиз инсонлар, саноат ва жамият равнақ топиши учун алоқанинг тўлиқ имкониятларини рўёбга чиқаришдир. Мобил экотизим ва унга ёндош соҳалар бўйлаб мобил операторлар ҳамда ташкилотларни ифода этувчи GSMA ўз аъзоларига уч асосий йўналишда хизмат кўрсатади: Эзгулик йўлидаги алоқа, саноат хизматлари ва ечимлари ҳамда ташқи алоқалар. Бу фаолият сиёсатни такомиллаштириш, бугунги куннинг энг долзарб ижтимоий муаммоларини ҳал қилиш, мобил технологиялар ва ўзаро ҳамкорликни таъминловчи технологияларни қўллаб-қувватлаш, шунингдек, MWC ва M360 тадбирлари доирасида мобил экотизимни тўплаш учун дунёдаги энг йирик платформани тақдим этишни ўз ичига олади. Батафсил маълумот олиш учун gsma.com сайтига ташриф буюринг

Beeline Uzbekistan ҳақида

«Unitel» МЧЖ 2006 йил 12 сентябрдан бошлаб Beeline Uzbekistan савдо белгиси остида рақамли оператор сифатида фаолият юритмоқда. Beeline Uzbekistan бош қароргоҳи Дубайда жойлашган VEON Group халқаро телекоммуникация ҳолдингига киради. Unitel 2024 ва 2025 йилларда «Топ Employer» сертификатига эга бўлди.

VEON деярли 160 миллион мижозга конвергент уланиш ва рақамли хизматларни тақдим этувчи рақамли оператордир. Дунё аҳолисининг 7 фоиздан ортиғи истиқомат қиладиган олтита мамлакатда фаолият юритаётган VEON, инсонларнинг имкониятларини кенгайтирувчи ва иқтисодий ўсишни рағбатлантирувчи технологияларга асосланган хизматлар орқали ҳаётни ўзгартирмоқда. Бош қароргоҳи Дубайда жойлашган. VEON NASDAQ'да рўйхатдан ўтган. 

Beeline Uzbekistan таркибида тахминан 1,9 минг ходим ишлайди. VEON 2006 йилдан буён, яъни бозорга кириб келган вақтидан бошлаб, Ўзбекистон телекоммуникация соҳасига 1,4 миллиард АҚШ долларидан ортиқ сармоя киритган. «Unitel» МЧЖ Ўзбекистондаги энг йирик солиқ тўловчилардан бири ҳисобланади. Beeline Ўзбекистондаги фаолияти давомида тахминан 2 миллиард АҚШ доллари миқдорида солиқ тўлаган.