Мадагаскарнинг собиқ президенти Дидье Рацирака 28 март куни 85 ёшида ҳаётдан кўз юмди. Бу ҳақда якшанба куни амалдаги давлат раҳбари Андри Радзуэлина маълум қилди.

«Малагасияликлар ватанпарваридан жудо бўлишди. Ҳамдардлик билдираман», — деб ёзди у «Twitter»да.

«Jeune Afrique» журналининг ёзишича, Рациракага грипп ташхиси билан 22 март куни пойтахт Антананаривудаги ҳарбий госпиталга ётқизилган. Собиқ президентнинг аҳволи шифокорларни хавотирга солмаган, аммо якшанба куни кечқурун у тўсатдан оғирлашиб қолган.

Ўлимининг сабаби ҳали расман эълон қилинмади.

Дидье Рацирака 1936 йил 4 ноябрда дунёга келган. У 1976 йилдан 1993 йилгача ҳамда 1997 йилдан 2002 йилгача икки марта Мадагаскар президенти бўлган.

Биринчи марта ҳокимиятга келганидан сўнг у Собиқ Иттифоқ билан алоқа ўрнатган. 1976 йилда у Малагасия инқилоби авангардини (AРЕМA) ташкил этган.

2003 йилда у Малагасия суди томонидан ваколатини суиистеъмол қилганлиги ҳамда пул маблағларини талон-торож қилганлиги учун ўн йиллик оғир меҳнатга сиртдан ҳукм қилинган. Бундан бир йил олдин собиқ президент Францияга жўнаб кетган: ҳукумат уни топширишдан бош тортган. Рацирака 2011 йил кузида амнистиядан сўнг Мадагаскарга қайтиб борган.