Avvalroq joriy yil 10-fevral imzolangan Prezidentning tadbirkorlik faoliyatini amalga oshirish uchun qulay shart sharoitlarni yaratishni nazarda tutuvchi PF-21-son Farmoni 7-bandida 2023-yil 1-maydan boshlab jismoniy shaxslar o‘rtasida pul o‘tkazmalarini amalga oshiruvchi tashkilotlar ko‘rsatilgan xizmatlar uchun komissiya olinishidan qat’iy nazar elektron hisobvaraq-fakturani rasmiylashtirishlari va taqdim etishlari belgilangani haqida xabar berilgan edi.

Mazkur tartib ijtimoiy faollar o‘rtasida muhokama mavzusi bo‘lib kelmoqda. Iqtisodiyot va moliya vazirligi muallifligida ishlab chiqilgan farmonning 7-bandi 4-xatoboshisi qonunchilikka zid kelishidan tortib, uning hujjat loyihasida bo‘lmaganigacha ayni vaqtga qadar turli nashrlarda tanqid ostiga olib kelinyapti. 

Iqtisodchi Otabek Bakirov bu tartibning joriy yil 1-may kunidan kuchga kirgan yangilangan Konstitutsiyaga ham mutlaqo zidligi va noqonuniy ekanligini yozyapti.

«Bosh qomusning 15-moddasiga ko‘ra, O‘zbekiston Respublikasi Konstitutsiyasi oliy yuridik kuchga ega bo‘lib, to‘g‘ridan-to‘g‘ri amal qiladi. Ya’ni hech bir hujjat, u nizommi, farmonmi, qarormi yo qonunmi Konstitutsiyaga zid bo‘lishi mumkin emas. Agar zid bo‘lsa, Yangi Konstitutsiya uni avtomatik tarzda bekor qiladi», – deya eslatadi Bakirov.

Konstitutsiyaning 41-moddasida esa «Bank operatsiyalarining, omonatlarning va hisobvaraqlarning sir tutilishi, shuningdek, meros huquqi qonun bilan kafolatlanadi», deb yozib qo‘yilgan.

Iqtisodchining ta’kidlashicha, yuqoridagilarga ko‘ra 3 oydan buyon muhokamalar mavzusi bo‘lib kelayotgan, loyihada bo‘lmasdan, hujjatning imzolatish uchun Prezidentga kiritilayotgan paytda qo‘shib yuborilgan bank sirini tashkil etuvchi P2P o‘tkazmalar haqidagi ma’lumotlar soliq organlarida jamlanishinini ko‘zda tutadigan PF-21 Farmonning 7-bandi 4-xatboshisi Konstitutsiyaga zid va noqonuniy.

«Banklar bank sirini tashkil etuvchi P2P o‘tkazmalar haqidagi ma’lumotlarni soliq organlariga taqdim etishni zudlik bilan to‘xtatishi, soliq organlari P2P o‘tkazmalar haqidagi ma’lumotlarni elektron hisobvaraq-faktura yoki boshqa kanallar vositasida olishdan voz kechishlari zarur!» – deydi Otabek Bakirov.

U, shuningdek, barchani Yangi Konstitutsiyaga amal qilishga chaqiradi va «amal qilmasak, nega Konstitutsiyani yangiladik?» degan savolni o‘rtaga tashlaydi.