Сирдарё вилояти Ховос тумани Янгиер МФЙ ҳудудида 10 гектар майдонда «Ховос озиқ-овқат саноат технопарки» фаолияти йўлга қўйилади. Вазирлар Маҳкамасининг бу борадаги тегишли қарори лойиҳаси муҳокамага эълон қилинди.

Саноат технопарки фаолиятининг асосий йўналишлари этиб қуйидагилар белгиланмоқда:

- импорт ўрнини босувчи юқори қўшилган қийматга эга товарларни ишлаб чиқариш;

- хорижий давлатлар бозорларига қайта ишланган тайёр маҳсулотлар экспорт қилиш;

- хорижий инвестициялар, халқаро молия институтлари маблағларини жалб қилиш ва бошқа манбалар ҳисобига қишлоқ хўжалиги маҳсулотларини бирламчи ва чуқур қайта ишлаш ҳамда жамғаришни ташкил этиш;

- мева-сабзавот ва бошқа қишлоқ хўжалиги маҳсулотларини етиштириш, озиқ-овқат саноат маҳсулотларини ишлаб чиқариш, сақлаш, шунингдек, божхона, банк, логистика, экспресс-лаборатория, фитосанитар, ветеринар, санитар-эпидемиологик, сертификатлаштириш ва бошқа хизматларни амалга ошириш;

Қайд этилишича, 2023-2025 йиллар давомида саноат технопарк фаолияти тижорат банклари, хорижий молия институтлари ва инвесторларнинг жалб қилинган ва жалб қилиниши кўзда тутилган 25 млн АҚШ доллари маблағлари ҳисобига амалга оширилади.