Sirdaryo viloyati Xovos tumani Yangiyer MFY hududida 10 gektar maydonda «Xovos oziq-ovqat sanoat texnoparki» faoliyati yo‘lga qo‘yiladi. Vazirlar Mahkamasining bu boradagi tegishli qarori loyihasi muhokamaga e’lon qilindi.

Sanoat texnoparki faoliyatining asosiy yo‘nalishlari etib quyidagilar belgilanmoqda:

- import o‘rnini bosuvchi yuqori qo‘shilgan qiymatga ega tovarlarni ishlab chiqarish;

- xorijiy davlatlar bozorlariga qayta ishlangan tayyor mahsulotlar eksport qilish;

- xorijiy investitsiyalar, xalqaro moliya institutlari mablag‘larini jalb qilish va boshqa manbalar hisobiga qishloq xo‘jaligi mahsulotlarini birlamchi va chuqur qayta ishlash hamda jamg‘arishni tashkil etish;

- meva-sabzavot va boshqa qishloq xo‘jaligi mahsulotlarini yetishtirish, oziq-ovqat sanoat mahsulotlarini ishlab chiqarish, saqlash, shuningdek, bojxona, bank, logistika, ekspress-laboratoriya, fitosanitar, veterinar, sanitar-epidemiologik, sertifikatlashtirish va boshqa xizmatlarni amalga oshirish;

Qayd etilishicha, 2023-2025-yillar davomida sanoat texnopark faoliyati tijorat banklari, xorijiy moliya institutlari va investorlarning jalb qilingan va jalb qilinishi ko‘zda tutilgan 25 mln AQSh dollari mablag‘lari hisobiga amalga oshiriladi.