АҚШ томонининг Қримни Россия ҳудуди деб тан олиш тўғрисидаги эҳтимолий таклифи ортидан Зеленский айни шу мавзуда журналистлар учун брифинг ташкил қилди. 

22 апрель куни бўлиб ўтган брифингда Украина раҳбари журналистнинг Қрим борасидаги Киев позицияси ҳақидаги саволига «бу ерда гаплашадиган ҳеч нарса йўқ - бу бизнинг Конституциямизга зид», – дея жавоб берди.

Зеленскийнинг сўзларига кўра, Қрим ва Россия томонидан босиб олинган бошқа ҳудудлар масаласини муҳокама қилиш фақат урушнинг чўзилишига олиб келади.

«Қрим ҳақида, суверен ҳудудларимиз ҳақида гапира бошлашимиз билан биз урушни узайтириш йўлига кирамиз. Россия эса айнан шуни хоҳлаяпти. Биз 12 йилдан бери курашяпмиз. Бу Россия билан ҳудудлар бўйича келишувга эришиш мумкинми, деган саволингизга жавоб», - дейди Украина президенти.

Унинг қўшимча қилишича, Лондондаги музокараларда Украина делегацияси шартсиз ёки қисман ўт очишни тўхтатишни муҳокама қилиш ваколатига эга.

«Биз бу босқичга тайёрмиз», – деди Зеленский.

Лондонда Украина ва Европа делегацияларининг АҚШ томони билан учрашуви олдидан Зеленский, шунингдек, Запорижье АЭС борасида ҳам тўхталган.

«Фақат Украина Запорижье АЭС оператори бўлиши мумкин», – деди Зеленский АҚШнинг АЭС яқинидаги ҳудудни назорат қилиш ҳақидаги таклифига изоҳ бериб.

Украина раҳбарига кўра, АҚШ Запорижье АЭСида Киевсиз ишлай олмайди.

Эслатиб ўтамиз, 23 апрел куни Лондонда бўлиб ўтадиган музокараларда Украина делегацияси, Зеленский таъкидлаганидек, сўзсиз ёки қисман ўт очишни тўхтатишни муҳокама қилиш мандатига эга бўлади.