2019 йил март ойида Янги Зеландиянинг Крайстчерч шаҳрида масжидларга ҳужум уюштирган австралиялик Брентон Таррант босқинчиликка пухта тайёргарлик кўрган ва жиноятни бир йилдан ортиқ ипидан игнасигача режалаштирган. Бу ҳақда мазкур иш юзасидан суд йиғилишида тақдим этилган маҳаллий полиция маълумотларига таяниб Янги Зеландиянинг «Stuff» янгиликлар портали хабар берди.

24 август куни порталда чоп этилган материалга кўра, 29 ёшли қотил 2017 йил Янги Зеландияга етиб келиб, Данидинга жойлашган. Ўша йили сентябрда у ўқотар қурол олиш учун ариза берган ва босқинчиликка қадар қурол-яроғ тўплаган. Гап кучли ўқотар қуроллар, ҳарбий мақсадларда ишлатилувчи мўлжалга олувчи комплекслар, зирҳли нимча ва етти мингдан ортиқ патрон ҳақида бормоқда. Ёвуз ниятли киши, шунингдек, мерганлик клубларига қатнай бошлаган ва қуроли тезроқ отиш учун тепки механизмларини модернизация қилди.

Шу билан бир пайтда у интернет орқали масжидларнинг режаси ва жойлашуви, уларнинг ички фотосуратлари, шунингдек, масжидлар қачон одамларга тўла бўлишини аниқлаш учун исломий байрамлар тақвимини ўрганиб чиқди.

2019 йил 15 март куни Янги Зеландиянинг Крайстчерч шаҳрида иккита масжидда террорчилик ҳаракати содир этилган. Ёвуз ниятли одам ибодатга келувчиларни шафқатсизларча ўққа тута бошлаган. Буям етмагандай, ўз қилмишини интернетда намойиш этган. Ўшанда 50 киши, жумладан, аёллар ва болалар жон беришган. Ҳужум террорчилик ҳаракати деб тан олинган. Қўлга олинган Таррант айбига иқрор бўлган, адвокатлар хизматидан бош тортган ва судда ўзини ўзи ҳимоя қилишга қарор қилган, деб ёзади «Gazeta.ru».

У 51 та қотиллик ва 40 та суиқасд, шунингдек, террорчилик ҳаракатида айбланмоқда. ОАВ хабарига кўра, Таррант Янги Зеландияда муддатидан олдин озод қилиш ҳуқуқидан маҳрум этилган ҳолда умрбод қамоқ жазосига ҳукм қилинган биринчи жиноятчига айланиши мумкин.