Ўзбекистонда болаларга автотранспорт воситаларини бошқариш учун рухсат берган шахсларга нисбатан жавобгарлик кучайтирилади. Бу ҳақда Президент Шавкат Мирзиёев раҳбарлигида ўтказилган мактаб таълими тизимидаги ислоҳотлар ва устувор вазифаларга бағишланган видеоселектор йиғилишида маълум қилинди.

Давлат раҳбари, хусусан, Наманганда ўқувчиларга машина ижарасига бериш ҳолатлари кенг тарқалганини, бу эса ҳар ойда ўртача 10−15 нафар боланинг жароҳат олишига, айрим ҳолларда эса уларнинг ҳалок бўлишига сабаб бўлаётганини қайд этди. Шу муносабат билан, у болаларга транспорт воситаларини бошқаришга рухсат берганлик учун жавобгарликни кучайтиришга қаратилган қонун лойиҳасини ишлаб чиқишни топширди.

Йиғилишда шунингдек, мактаб ўқувчиларининг смартфонларга ортиқча муҳтож бўлиб қолаётгани, ота-оналар ва устозларнинг бу борадаги масъулияти, шунингдек, ички ишлар ва прокуратура органларининг қонун устуворлигини таъминлашдаги сусткашлиги ҳам муҳокама қилинди.