«Жўрналистмисан, қизим?» – тунги соат 01:00 лардан кейин қўнғироқ қилган кишининг саволи шу бўлди.

«Ассалому алайкум! Ҳа, лаббай, эшитаман, отахон?!»

«Сенларни ахборот тарқатишда шунчаки қуруқ маълумотга таяниш билан чекланишларинг охири таълимниям "пул"га айлантириб юборди. Энг хунук ахборотниям шунчаки кўз югуртириб танишиш билан чекланишга кўникиб ҳам боряпмиз. Бир хабар бераётганда, иймону инсофнинг ҳам йўқолиб бораётганини қўшиб қўйларинг. Маънавиятсизликни маънавият билан ўлдирларинг!» – деди отахон бироз жазавага тушиб.

Масаланинг нимада эканини англаб ололмадиму:

«Узр, отахон, ҳар бир жанрнинг ўз талаби бор!  Сизни қандай масала қийнаяпти?»

«Э-э, қизим, қўйсанг-чи, ўша жанрларинг талабини! 30 йилдан ортиқ таълим соҳасида ишладим. Бошқа соҳаларни-ку, билмадим, таълимнинг пулга айланаётгани энди фожеа-да! Маҳалламиздан бир инсофи йўқ таълим соҳаси вакили бошқа бир фуқарони ишга қабул қилиш учун пора олибди. Шунчаки,  «пора олди, қўлга тушди, энди қонун олдида жавоб беради», – деб ёзиб қўйишибди. Иймону инсофга чақириқ ҳам қўшиб қўйинглар, ўша ахборотларингга! Одамлар юрагидан ўчиб бораётган маънавиятни қайта ёндиришга ҳисса қўшинглар. Қуруқ хабарларингни ўқийвериб, одамлар дийдаси тошдек қотяпти», – ўзини Гулмурод Неков, деб таништирган отахон куйиниб сўзлади.

Маълум бўлишича, Бухоро вилояти, Ғиждувон туманидаги "Олмазор"  маҳалласида жойлашган

5-сонли ИДУМда ҳуқуқ-тартибот органларига келиб тушган аризага кўра, тезкор тадбир ўтказилган.

Тезкор тадбирда ушбу маҳаллада яшовчи, 1986 йилда туғилган таълим соҳаси вакили Ш.В. исмли аёл бошқа бир фуқарони ишга қўйиш эвазига пора олаётганда, қўлга олинган.

«200 доллар эвазига бутун бошли меҳнатини ер билан битта қилган ўқитувчини ким, деб аташ мумкин? Хабарни эшитиб, шу соҳада 30 йилдан ортиқ сочим оқарганидан уялиб кетдим. Ўқитувчилар оиласимиз-да! Бутун бошли ўқитувчиларга иснод бўлди. Йиғлагудек аҳволдаман!» – деди отахон яна сўзида давом этар экан.

Таъкидланишича, Ш.В. аввалдан ўзига таниш бўлган фуқаро С.Н.ни  5-сонли ИДУМда компьютер техник оператори лавозимига ишга киритиб қўйиш эвазига ундан 200 АҚШ доллари миқдорида пора талаб қилган. С.Н. бунга имкони йўқлиги, пули бўлганда, иш қидирмаслиги, агар рози бўлса, ишлаб, маош олгандан сўнг Ш. В. нинг талаб қилган маблағини аста-секин тўлаб боришини билдирган. Афсуски,  С. Н.:  " Сени раҳбарият қачон маош олади-ю, қачон 200 долларни топиб беради, деб кутиб турмайди. Истасанг шу, истамасанг, бошқа!"-деган қўпол жавобни олган. Шундан сўнг орадан вақт ўтгач, С. Н.  Ш. В.нинг шартига кўнганини унга телефон орқали билдирган. Ва ҳолат юзасидан ҳуқуқ-тартибот идораларига ариза билан мурожаат қилишга мажбур бўлган.

«Бу шунчаки "пора олди, қўлга тушди, жазоини олади" деган гапмас-да, қизим. Унинг ортида Президентимизнинг ўқитувчиларга ишониб, "уларнинг маошини 1000 долларга чиқармасам қўймайман!"-деган катта эътибори турибди. Бундай номаъқулчиликни касбини севган муаллим қилмайди. Иймониниям еб қўйган одамнинг иши-да бу! Таълим пулга айланса, тиббиёт "соққа"га кўмилса, қурилиш битмай туриб чириса,  журналист буларни  "олди, бўлди, кетди" деб қуруқ қалам теккизиб қўйса, маънавият сўлиб бораётганидан ҳеч ким лом-мим, демаса,  яра авж олаверади», – дейди суҳбатдош.

Ҳолат юзасидан баён этилган хабарга кўра, Ш.В. фуқаро С.Н. дан кимёвий ишлов берилган 2 миллион 500 минг сўм пулларни олган вақтида ашёвий далиллар билан ушланган.

Мазкур ҳолат юзасидан фуқаро Ш.В. га нисбатан Ўзбекистон Республикаси Жиноят Кодексининг 168-моддаси (Фирибгарлик) 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

«Ўқитувчилик-фидоийлик! Бу касбу корга иснод келтириш - бошқа бутун бошли ўқитувчилар меҳнатини, заҳматини осмонга совуриш, ер билан битта қилиш, дегани. Ўқитувчи қизларим, ўғилларим касбу корингизни ҳаром луқмага алишманг!» – деди отахон суҳбати сўнггида.