ДХХнинг Қашқадарё вилояти бўйича бошқармаси ҳамда ИЖҚКД ҳамкорлигида ўтказилган тезкор тадбирда туман солиқ испекцияси бошлиғининг ўринбосари ҳамда шу ишга алоқадор шахс пора олаётганида қўлга тушди.

Қамаши туманида яшовчи, 1981 й.т. муқаддам судланган шахс 360 млн сўмлик солиқ қарздорлигини тўламаганлиги сабабли Иқтисодий суд томонидан банкрот деб топилган ғишт ишлаб чиқарувчи МЧЖнинг солиқ қарздорлигини тўлиқ тўламасдан, заводга нисбатан қўйилган тақиқни ўзининг мансабдор танишлари орқали бекор қилдириб, унинг фаолиятини тиклаб бериш эвазига МЧЖ раҳбаридан 4 000 АҚШ доллари талаб қилган. Ўтказилган тезкор тадбирда у олдиндан 3 000 АҚШ долларини олган вақтида ушланган.

Тезкор тадбир давомида ушбу ноқонуний ишга алоқадор бўлган Қамаши туман солиқ инспекцияси бошлиғининг ўринбосари ҳам 3 000 АҚШ долларини олган вақтида ашёвий далиллар билан ушланган.

Ҳолат юзасидан икки қонунбузарга нисбатан жиноят иши қўзғатилиб, тергов ҳаракатлари олиб борилмоқда, дейилади хабарда.