Ўзбекистон Республикаси Президенти кеча Бухорода бўлиб, кучли шамол етказган зарар оқибатларини шахсан ўргангани ва маҳаллий аҳоли вакиллари билан мулоқотда бўлгани хабар қилинган эди. Президент матбуот хизмати ушбу сафар тафсилотлари тасвирланган видеолавҳани намойиш этди.

«Энг катта нарса — Сизнинг кайфиятингиз бузилмаслиги. Мен ўзим етиб келганим сабаби шу. Қўлимда ҳамма маълумот бор.

Меҳнат қиламиз, жипслашамиз. Эртага даромадимиз бундан ҳам кўп бўлади. Яна бир марта айтаман, мен ҳамма қарорни қабул қилиб бўлдим, ҳеч қандай зарар бўлмайди. Энг катта нарса — ваҳимага тушмасдан, саранжом бўлиб, одамларимизни сақлашимиз керак. Шунинг учун ҳаммамиз эхтиёт, огоҳ бўлиб, ҳар кунлик ишимизда давом этишимиз керак.

Бу менинг жонажон Халқим — битта маҳалла ҳам, битта кўча, битта хонадон ҳам мен учун азиз, мукаррам. Мана шу азиз халқимизни қутқариш ҳам қарз, ҳам фарз. Ҳаммамизга.

Бирорта хонадон, бирорта ташкилот ва қишлоқ хўжалиги соҳасида бирорта фермерга зарар етказилмайди. Уйининг олдига шиферини ҳам олиб бориб берамиз, тахтасини ҳам олиб бориб қўямиз. Қурувчини ҳам карантиндан ўтиб, синалганини олиб келсак, хавф-хатар камроқ бўлади.

Ҳеч нарсани ўйламанг. Мана шу улуғ айём кунларида яна бир марта айтамиз, Илоҳим ҳамма бало шу билан кетган бўлсин», — деди Президент.