Ҳаётимда биринчи марта Ўзбекистон ичидаги авиапарвозда манзилга иккита самолёт алмаштириб етиб олдим. Очиғи, қачондир шунақа бўлади, деб ҳеч ўйламаган эканман.

Куни кеча, 2022 йилнинг 26 март санасида Туризм ва маданий мерос вазирлиги томонидан ташкил этилган инфотур доирасида Тошкент-Нукус-Мўйноқ рейси амалга оширилди. Шу тариқа ўттиз йилнинг бадалида биринчи марта Мўйноққа рейс самолёти келиб қўнди. Таассуротлар бир дунё.

Аввалига эрта тонгда Тошкентдан Нукусга учиб келдик. Бу ерда ҳамма транзит парвозларида бўлгани сингари самолётдан тушиб, юкларимизни олиб, аэропортда қайта рўйхатдан ўтиб, яна Мўйноққа учадиган рейсга чиқдик. Ғалати бўларкан. Унча катта бўлмаган тажрибам доирасида биринчи марта транзит йўналиш учраганига қувондим. Хориж сафарларида бунақасини кўрганмизу, аммо ўз юртингдаси бошқача туюларкан. Бўларкану!

Нукусдан Мўйноққа ҳали ҳеч қачон бунчалар тез бормагандим. Самолёт чўл устидан учиб ўтиб, қуриган Орол соҳили бўйлаб бир айланиб олди-да, яқинда фойдаланишга топширилган яп-янги учиш-қўниш йўлагига қўнди. Ўттиз йилнинг бадалида илк рейс бу!

Истардикки, бундай рейсларнинг сони-саноғи бўлмасин. Охирги йилларда анча фаоллашган геологларимизнинг ҳисоб-китоб қилишича, Орол денгизи тубида кўпдан-кўп табиий бойликларимиз ётибди. Президент Шавкат Мирзиёев тунов куни Халқаро инвестиция форумида сўзлаган нутқида хом-ашё ресурсларини чуқур қайта ишлаш ва келгуси беш йилда газ, газ-кимё, электроника, фармацевтика ҳамда тўқимачилик бўйича 120 миллиард долларлик инвестицияларни жалб этиш бўйича аниқ лойиҳалар ишлаб чиқилганини айтган эди.

Насиб қилса, мана шу инвестициянинг бир учи Қорақалпоғистонга ҳам аталгани шубҳасиз. Ишонамизки, Мўйноқдаги янги аэропорт маҳсулотларимизни дунёга етказишда ҳали роса асқотади.

Мўйноқ-Париж, Мўйноқ-Лондон ва Мўйноқ-Нью-Йорк рейсларини кўриш насиб қилсин...

Маълумот учун: Мўйноқ аэропорти 1990 йиллардан бери авиаташувлар учун фойдаланилмай келаётган эди. Илгари ушбу аэропортдан Нукус, Урганч, Тошкент ва мамлакатимизнинг бошқа шаҳарларига парвозлар амалга оширилган. Ўзбекистон ҳукумати қарорига асосан Мўйноқ аэропортини реконструкция қилиш 2019 йилда бошланди. Бугунга келиб ушбу аэропортнинг терминал биноси, атрофдаги тўсиқлар ва учиш-қўниш йўлаги тўлиқ барпо этилган.