Irvine Valley коллежида гуманитар фанлар соҳаси кичик мутахассиси даражасини олган 11 ёшли Афина Эллинг АҚШдаги энг ёш коллеж битирувчисига айланди. 

Эътиборли томони, ўтган йили шу коллежни тамомлаган унинг акаси Тичо энг ёш битирувчи бўлганди. Аммо у ўшанда синглисидан ярим ёш катта эди — рекорд Афинага ўтди.

Акаси каби Афина ҳам ўрта мактабга эрта борган, маҳаллий коллежда ўқишни давом эттирган.

Қизнинг айтишича, диплом олиш ҳеч қачон асосий мақсади бўлмаган, шунчаки акаси Тичонинг рекордини янгилашни мақсад қилган. Умуман олганда, ошпазлик, таэквондода ҳам доим акасидан ўзишга интилиб келади.

Афинанинг онаси Кристина Чоу айтишича, ҳеч қачон фарзандларини бу йўлга мажбурлашмаган. Болалари шунчаки ўқишга қизиқишади, иккаласи ҳам юқори натижаларга мустақил эришишган.

Тичо ҳозирда Калифорния университетида математикадан бакалавр даражасини олиш арафасида. Афина эса мусиқа ёки психология йўналишида яна бир кичик мутахассис даражасини олишни режалаштирган.