Янги сиқилган шарбат таркибида фойдали минерал ва витаминлар бор, бироқ уларни мунтазам истеъмол қилганда саломатлик билан боғлиқ муаммолар клиб чиқиши мумкин. Бу ҳақда россиялик шифокор-эндокринолог, тиббиёт фанлари номзоди Зуҳра Павлова маълум қилди.

Унинг таъкидлашича, бир стакан концентрацияланган шарбат — ўртача иккита катта апельсин дегани.

«Одатда одам бир ўтиришда бунча апельсин емайди», — дея мутахассиснинг биринчи далили келтирилган.

«Агар 100 миллилитр кола билан 100 миллилитр апельсин шарбатини солиштирадиган бўлсак, иккаласида ҳам қанд миқдори бир хил», — дея давом эттиради шифокор.

Шунингдек, унинг таъкидлашича, янги сиқилган шарбатда клетчатка деярли бўлмайди. У қонга глюкоза ва фруктоза тушиш тезлигини пасайтиради ва ичак микрофлорасига ижобий таъсир кўрсатади.

«Бир стакан шарбат ичиш натижасида тез сўриладиган оддий углеводлар — глюкоза ва фруктозани биратўла кўп миқдорда қабул қиламиз. Бу эса углевод алмашинуви ва жигар метаболизмига салбий таъсир кўрсатади», — деб ёзади Зуҳра Павлова ўзининг telegram-каналида.

У янги сиқилган шарбатларни мунтазам ва кўп миқдорда истеъмол қилиш эртами-кеч қандли диабет, подагра, юрак-қон томир ёки жигар касалликларига олиб келишидан огоҳлантирди.