«Ўзбеккино» миллий агентлиги буюртмасига асосан, яна бир буюк сиймолардан бири — Имом Исо ат-Термизий ҳақида ҳикоя қилувчи фильмни суратга олишга қизғин ҳозирлик кўрилмоқда. Бу ҳақда агентлик ахборот хизмати хабар берди.

Шу кунларда режиссёр Абдухалил Мингноров томонидан актёр ва актрисалар гуруҳи синовдан ўтказилмоқда. Фильм ижодкорларининг якуний таркиби эса 2 февраль куни бўлиб ўтадиган Бадиий кенгашнинг навбатдаги йиғилишидан сўнг маълум бўлади.

Ижодкорлар «Дунё бўйлаб» телеканали ижодкорлари тасвирга олиш майдонига ташриф буюриб, жараённи бевосита, жонли кузатдилар. Жорий йилнинг 3 февраль куни соат 19:05 да ушбу телеканал орқали эфирга узатиладиган «Тафсилот» кўрсатуви орқали фильм ҳақида батафсил маълумотга эга бўлиш мумкин.

Фильм сценарийси муҳаддис олим — Абу Исо ат-Термизийнинг ҳаёти, фаолияти билан боғлиқ воқеалар ва унинг устози Имом Бухорий билан ўтказган машғулотлари ҳақидаги ҳикоялар асосида ёзилган. Лойиҳани амалга оширишда Шайх Абдулазиз Мансур ҳам ўзининг қимматли маслаҳатлари ва кўрсатмалари билан иштирок этмоқда.