COVID-19ни бошдан ўтказган инсонлар коронавирусни қайта юқтирганда хавфлироқ симптомларга дуч келиши мумкин. Бу ҳақда АҚШнинг Невада университети ва бошқа илмий ташкилотлари олимлари маълум қилишди.

Тадқиқотчилар 48 кун давомида SARS-CoV-2нинг икки хил тури билан касалланган 25 ёшли бемор (невадалик)ни мисол келтиришди. Унда иккинчи марта касалланиш биринчисига нисбатан анча оғир кечди, зудлик билан касалхонага ётқизиб, кислород билан сунъий равишда таъминлашга тўғри келган. Қолаверса, Бельгия, Нидерландия, Гонконг ва Эквадордаги шунга ўхшаш қайта касалланиш ҳолатлари тилга олиб ўтилган.

Мутахассисларга кўра, невадалик беморнинг иккинчи касалланиши оғир кечишига вирус дозаси юқорилиги сабабчи бўлиши мумкин. Ёки у SARS-CoV-2нинг янада вирулентроғини (кучлироғини) юқтириб олган, ё бўлмаса антитанага боғлиқ инфекция кучайиши юз берган — бу ҳолатда организм ишлаб чиққан антитаналар қайта юқтириш оқибатларини янада ёмонлаштириб юборади.

Коронавируснинг қайта юқиши унга қарши вакцина ишлаб чиқиш ишларини савол остида қолдиради, шунга қарамасдан, ҳозирча реинфекция (қайта юқиш)  ҳолатлари камдан-кам учрамоқда.