Вашингтон университети (АҚШ) олимлари Хитойда мутацияга учраган ва турлар орасида юқиши мумкин бўлган янги коронавирус топилгани ҳақида хабар беришди. У HKU5-CoV‑2 деб номланди.

Тадқиқотчилар Merbecoviruses деб номланган коронавирусларнинг камроқ маълум бўлган кичик гуруҳини ўрганишди, бу HKU5 ва Яқин Шарқ респиратор синдромини келтириб чиқарадиган MERS-CoVни ўз ичига олади. Улар HKU5 оқсилидаги кичик ўзгариш унинг одамларда ACE2 ҳужайраларига бириктирилишига имкон беришини аниқладилар. Янги вирус нафас йўллари ва ичакларда ҳам инфекцияланиши ва кўпайиши мумкин. Тадқиқот Nature Communications журналида чоп этилди.

ЖССТ маълумотларига кўра, Яқин Шарқ респиратор синдроми билан касалланганларнинг тахминан 35 фоизи вафот этади. 2012 йилдан бери 27 мамлакатда касаллик қайд этилган, натижада 858 киши инфекция туфайли вафот этган. У туялар орқали юқади.

HKU5 биринчи марта феврал ойида хитойлик олимлар томонидан кўршапалакларда топилган. Бироқ, мутахассислар хавфларни ошириб юборишдан огоҳлантирмоқда: вирус COVID-19 пандемиясини келтириб чиқарган Sars-CoV-2 каби инсон ҳужайраларига осонликча кира олмайди.

Вирусолог ва тадқиқот етакчиларидан бири, профессор Майкл Летко шундай деди: "HKU5 вируслари аввал кам ўрганилган бўлса-да, бизнинг тадқиқотимиз улар ҳужайраларни юқтириши мумкинлигини кўрсатмоқда. Шунингдек, улар одамларга юқишдан бир қадам нарида эканлигини аниқладик".

Гарчи хавф юқорилигича қолаётган бўлса-да, бу аллақачон содир бўлганлиги ҳақида ҳеч қандай далил йўқ, деб ёзади муаллифлар. Ҳозирча ваҳима қилишнинг ҳожати йўқ.