АҚШ президенти Доналд Трамп Россия раҳбари Владимир Путиннинг ҳаракатидан дарғазаб бўлди.

Трампга Путиннинг Украина президенти Владимир Зеленскийнинг ҳокимияти легитимлигини шубҳа остига олгани ёқмаган. Путин ўтган ҳафта Зеленскийнинг президентлиги қонуний эканини савол остига олган ва БМТ, АҚШ ҳамда Европа мамлакатлари шафелигида Украинада муваққат бошқарув жорий этишни таклиф қилган эди.

Сайловолди кураш даврида Украина урушини 24 соат ичида тўхтатишга ваъда берган Трампга Путиннинг тинчлик бўйича келишувни пайсалга солаётгани хуш келмаётир.

“Агар биз Россия билан Украинада хунрезликни тўхтатиш борасида келиша олмасак ва бу ҳол Россиянинг айби билан рўй берса, мен Россиядан келаётган нефтга иккиламчи божлар жорий қиламан”, – деган АҚШ раҳбари.

Таҳлилчиларга кўра, Кремл Оқ уй таклиф этаётган тинчлик битимини қабул қилмай, турли-туман шартларни илгари сураётгани сабаб Трампнинг Путиндан ҳафсаласи пир бўлмоқда.

Трамп, айни чоқда, Украина президенти Владимир Зеленскийни ҳам фойдали қазилмалар тўғрисидаги битимни йўққа чиқаришда айблаган.

Президентлик лавозимига киришганидан кўп ўтмай, Трамп Путин билан телефон орқали суҳбатлашиб, Украинада тез орада тинчлик ўрнатилишига ишора қилганди.

Бу орада икки президент февраль ойи охиригача учрашиши мумкинлиги айтилди.

Аммо Вашингтон томонидан илгари сурилган вақтинчалик ўт очишни тўхтатиш ва доимий оташкесим бўйича музокара ўтказиш таклифи Москва томонидан пайсалга солингач, Трампнинг Путинга нисбатан риторикаси ўзгариб бормоқда.

Бунга қадар икки давлат раҳбари бир-бирини мақтовлар билан сийлагани, ҳатто “ёғли” таклиф билан чиқишгани маълум.