Демократлар партиясидан АҚШ президентлигига номзод  Жозеф Байден сўнгги дебатда рақиби — Республикачилар номзоди Дональд Трамп устидан ғалаба қозонди.

CNN телеканали сайловчилар ўртасида ўтказган сўровномада қатнашганларнинг 53 фоизи шундай фикрда. Трампни эса 39 фоиз сайловчилар қўллаб-қувватлаган.

Сўралганларнинг 70 фоизидан ортиғи рақиби Трамп шаънига йўллаган танқидларни тўғри деб ҳисоблайди. Сайловчиларнинг тенг ярми эса Оқ уй раҳбари ўзини оқлаб келтирган далилларга ишонади.

Трампда ҳам, кичик бўлса-да, ғалаба бор. Бу иқтисодиёт мавзуси. Сўралганларнинг 56 фоизи унинг иқтисодий сиёсати тарафдори. Аммо ички ва ташқи сиёсат, коронавирус пандемияси, иқлим ўзгаришлари, ирқий тенглик каби масалаларда аксарият Демократлар номзодини қўллаб-қувватламоқда.

Октябрь ойида ўтказилган сўровнома якунларига мувофиқ, Байден 16 фоиз устунлик билан зафар қучиши мумкин. Демократлар учун сайловчиларнинг 57 фоизи, Республикачилар учун эса 41 фоизи ўз овозини беришга тайёр, дейилади хабарда.