Чеченистон раҳбари Рамзан Қодиров Фаластинни қўллаб-қувватлашини ва бу урушга қарши эканини маълум қилди.

Қодиров жаҳон ҳамжамиятини «бир марта бўлса ҳам» Фаластин масаласида «адолатли қарор» қабул қилишга чақирди. Шунингдек, у мусулмон давлатлари раҳбарларига мурожаат қилиб, «Европа ва бутун Ғарбни жангариларни йўқ қилиш баҳонасида тинч аҳолини бомбардимон қилмасликка ундашга» чақирди.

«Улар у ерда ҳеч қандай жангари йўқлигини билишади, шунчаки қўрқитиш учун улар портлатишади, ўлдиришади» — дейди Чеченистон раҳбари.

Қодиров Фаластинни қўллаб-қувватлашини, чунки «Исроил бир вақтлар уларнинг ерларини тортиб олиб, мамлакатни қамалда ушлаб келаётганини» айтди. Унинг фикрига кўра, уруш шунчаки тугамайди.

Қодиров бир бор Исроилда бўлганини ва у ерда «муқаддас жой»ни зиёрат қилганини айтди.

«Биз билан бирга эскортлар бор эди ва улар бизни тўхтатиб, у ерда шовқин кўтаришимиз учун бизни ғазаблантиришга уринишди. Лекин биз кутдик. Асосий мақсадимиз Ал-Ақсо масжидига кириб намоз ўқиш эди», — деди Қодиров. У, шунингдек, ракета ҳужумидан зарар кўрган Абу Ғошдаги Аҳмат Қодиров масжидини тилга олди ва томонлардан унга ҳамда Ал-Ақсога тегмасликни сўради.

Қодиров зарурат туғилса, можаро ҳудудига тинчликпарвар кучларни юборишга тайёрлигини билдирди. «Биз ким ҳақ ва ким ноҳақ эканлигини аниқлаймиз ва курашни давом эттираётганларни тўхтатамиз», деди Чеченистон раҳбари.