Jahon sog‘liqni saqlash tashkiloti COVID-19ning kelib chiqishi bo‘yicha tergovni qayta boshlash uchun 20 olimdan iborat yangi ishchi guruhini tuzdi. Bu haqda Wall Street Journalga asoslanib TASS agentligi ma’lum qildi.

Yangi tuzilgan olimlar guruhiga laboratoriya xavfsizligi, biologik xavfsizlik, genetika va hayvonlar kasalliklari sohasidagi mutaxassislar kiradi. Tadqiqotlar Xitoy va boshqa bir qancha mamlakatlarda olib boriladi.

Patogenlarning kelib chiqishi bo‘yicha ilmiy maslahat guruhi doimiy ravishda ishlaydi. Ular kasalliklarning tarqalishini tekshiradi va insonlarning yangi kasalliklarning paydo bo‘lishiga olib kelishi mumkin bo‘lgan xavfli harakatlarini aniqlaydi.

Oldingi olimlar guruhi COVID-19 vujudga kelgan deb hisoblangan Uxan shahriga tashrif buyurib, xitoylik tadqiqotchilarga qon tahlillarini o‘tkazish va kasallikning dastlabki holatlarini tekshirishni tavsiya qilishgandi. Xitoy tomoni olib borilgan tekshiruvlar haqida hisobot bermadi va JSSTning dastlabki ishchi guruhi tarqatib yuborildi.

Jo Bayden ma’muriyatining rasmiylari, jumladan AQSh Davlat kotibi Entoni Blinken, tergovni qayta boshlashga qat’iy turib oldi. Endi olimlar koronavirusni tekshirish uchun yangi qon na’munalarini topishlari kerak bo‘ladi. Chunki koronavirusdan ilk vafot etganlardan olingan qon tahlillari hozirgi vaqtga kelib yaroqsiz holga kelib qolgan.

Shuningdek, bir necha oy davomida Xitoy hukumati JSST bosh direktori Tedros Adhan Gebreyesusdan nafaqat Xitoy, balki, Italiya va AQSh hududida ham tergov o‘tkazishni talab qilgan.