O‘zbekiston Prezidenti Administratsiyasi rahbari Sardor Umurzoqov Turkmaniston prezidenti Serdar Berdimuhamedov qabulida bo‘ldi.

Uchrashuvda Umurzoqov Turkmaniston prezidentiga O‘zbekiston rahbari Shavkat Mirziyoyevning samimiy salomi va ezgu tilaklarini yetkazdi hamda Berdimuhamedovni Xalqaro betaraflik kuni bilan tabrikladi.

Shuningdek, u ikki qardosh xalqning tarixiy, madaniy va ma’naviy mushtarakligiga asoslangan yaxshi qo‘shnichilik munosabatlarini e’tirof etgan.

Turkmaniston rahbari ham tabrik uchun minnatdorlik bildirib, ayni kunlarda Turkmanistonning BMT Bosh Assambleyasining tegishli rezolyusiyalari bilan ikki marta tasdiqlangan betaraflik maqomining 27 yilligi nishonlanayotganini ta’kidlagan. Prezident Serdar Berdimuhamedov ham O‘zbekiston rahbariga o‘z tilaklarini bildirib, mamlakat qardosh O‘zbekiston bilan an’anaviy va ishonchga asoslangan munosabatlarga sodiqligini ta’kidladi.

Suhbat chog‘ida Turkmaniston prezidenti va Umurzoqov so‘nggi yillarda ikki tomonlama munosabatlar sifat jihatidan yangi bosqichga ko‘tarilganini ta’kidladilar. Bu o‘zaro tushunish va ochiqlik asosida o‘rnatilgan davlatlararo munosabatlarga xos tamoyil bo‘lib, bu barcha sohalarda do‘stona hamkorlikni rivojlantirish imkonini berishi aytildi.

Shuningdek, kelgusida hamkorlikning yangi yo‘nalishlari muhimligi ham muhokama qilindi. Mamlakatlar o‘zaro savdo va sarmoya hajmini oshirish, sanoat, transport, energetika, qishloq xo‘jaligi kabi sohalarda qo‘shma loyihalarni amalga oshirish uchun katta imkoniyatlarga ega.

Uchrashuv yakunida Serdar Berdimuhamedov va Umurzoqov do‘stlik va yaxshi qo‘shnichilik an’analari asosida mustahkamlangan hukumatlararo hamkorlik bundan buyon ham izchil rivojlanib borishiga ishonch bildirdilar.