So‘nggi paytlarda plastik karta egalari ijtimoiy tarmoqlar orqali mobil ilovalarga ulangan telefon raqamini qanday uzish mumkinligi to‘g‘risida  qiziqib, qator  savollar  bilan murojaat qilishmoqda, — deyiladi «Uzcard» xabarida.

Ushbu mavzuni kengroq yoritish maqsadida Yagona umumrespublika protsessing markazi xodimlari tomonidan yaratilgan «SMS-xabarnoma xizmatini masofadan o‘chirish — STOP1» xizmatining imkoniyatlariga to‘xtalib o‘tdi.

Ma’lumki, agar biron bir mobil aloqa operatori mijozi 3 oy davomida telefon raqamidan foydalanmasa, u holda kompaniya avtomatik ravishda uni bloklab, yangi raqam egasi ixtiyoriga topshirishi mumkin. Shu o‘rinda savol kelib chiqadi: agar telefon raqamining ilk egasi o‘z plastik kartasini uning bloklanishidan avval mobil telefon raqami orqali mobil ilovalarga ulagan bo‘lsa, u holda telefon raqamining yangi egasi ham mobil ilovalar orqali plastik kartadan foydalana olishi mumkinmi?

Markaz mutaxassilari tomonidan shu kabi holatlarni bartaraf qilish uchun «SMS-xabarnoma xizmatini masofadan o‘chirish — STOP1» xizmati joriy qilingan. 3 oy davomida ishlatilmagan mobil telefon raqami yangidan sotuvga chiqishidan avval, mobil aloqa kompaniyasi YaUPMga mobil raqam xaqida ma’lumot yuboradi va unga biriktirilgan «UzCard» kartalarining SMS-xabarnoma xizmati faolligini to‘xtatadi. O‘z navbatida, barcha to‘lov tizimlariga (mobil ilovalar va hokazo) foydalanuvchilar parollarini to‘liq qayta tiklash funksiyasidan foydalanganida,  kabinetga biriktirilgan kartaga oid ma’lumotlarni tozalash va to‘lov tizimida xavfsiz foydalanish darajasini oshirish tavsiya qilingan.

«SMS-xabarnoma xizmatini masofadan o‘chirish — STOP1» xizmatining joriy qilinishi mobil aloqa mijozlarining karta xavfsizligini ta’minlashda hamda raqam yangi mijoz ixtiyorida emasliligiga ishonch hosil qilishda o‘z qulayligi bilan ajralib turadi, — qayd qilingan «Uzcard» ma’lumotida.