Koronavirus pandemiyasi davrida butun dunyo yogaga har qachongidan ko‘ra ko‘proq ehtiyoj sezmoqda: u kasallikka chalingan odamlarning tuzalishiga yordam beradi, dedi Hindiston bosh vaziri Narendra Modi.

21-iyun — Xalqaro yoga kuni.

Koronavirusga qarshi kurashda pranayama nafas tizimi mashqlari, ayniqsa, samarali. U respirator tizimini mustahkamlaydi. Shuningdek, ko‘pgina asanalar ham immunitetni mustahkamlashga xizmat qiladi, deya Modining so‘zlarini keltirgan «The Times of India».

«Yoganing chegarasi yo‘q, u yosh, jins, irq, teri rangi, kelib chiqishi, din tanlamaydi, u barchaga tegishli», — dedi siyosatchi.

COVID-19 kasalligini keltirib chiqaruvchi SARS-CoV-2 koronavirusi o‘tgan yili dekabr oyida tarqala boshlagan. Xitoyning Uxan shahri infeksiya o‘chog‘iga aylandi. Kasallik bir necha oy ichida dunyoning 210 ta davlatini qamrab oldi. 11-mart kuni JSST koronavirus pandemiyasini e’lon qildi.

Bugun, ya’ni 21-iyun holatiga ko‘ra, dunyo bo‘yicha 8,9 million kishida koronavirus qayd etildi. 466 ming nafar bemor vafot etdi, 4,7 million kishi tuzalgan.