IIV Kiberxavfsizlik markazi bergan xabarga ko‘ra, Surxondaryo viloyati Sherobod tumanida yashovchi fuqaro Z.J. hududiy IIBga ariza bilan murojaat qilib, firibgarlik qurboni bo‘lgani haqida ma’lum qilgan.

Murojaatda aytilishicha, u telegram messenjeridagi «Avtokredit bosh to‘lovsiz» guruhiga a’zo bo‘lgan va o‘zini guruh administratori deb tanishtirgan shaxsning 3 yil muddatga 90 mln so‘m evaziga 16 foizdan «Nexia-3» rusumli avtomashinani olib berishi haqidagi va’dasiga ishonib qolgan. Shundan so‘ng o‘zaro kelishuv asosida u boshlang‘ich 2 mln 180 ming so‘m pulni administratorga o‘tkazib bergan. Firibgan mazkur pullarni qo‘lga kiritgach, telegram messenjeridagi yozishmalarini o‘chirib tashlangan va qayta aloqaga chiqmagan.

Tezkor-qidiruv tadbirlari natijasida firibgarlik yo‘li bilan pullarni o‘zlashtirgan firibgarning shaxsiga aniqlik kiritilgan. Uning Jizzax viloyati Paxtakor tumanida yashovchi 2006-yilda tug‘ilgan mahalliy maktablarning biri 10-sinf o‘quvchisi M.D. ekanligi aniqlangan.

Hozirda M.D.ga nisbatan Jinoyat Kodeksining 168-moddasi bilan jinoyat ishi qo‘zg‘atilib, tergov harakatlari olib borilmoqda.