O‘zbekiston Matbuot va axborot agentligining «O‘zbekiston milliy ensiklopediyasi» davlat ilmiy nashriyotida O‘zbekiston xalq yozuvchisi Tohir Malikning 5 ta kitobdan iborat «Shaytanat» kitobi to‘liq nashrdan chiqdi. Bu haqda Matbuot va axborot agentligi xabar berdi.

Dunyo yaralibdiki, ezgulik va yovuzlik mudom bir-biri bilan jang qilib keladi, ana shu asnoda inson ham shu kurashlar aro andarmon, goh u tomonda, goh bu tomonda javlon uradi. Yanglishadi, xato qiladi, yiqiladi, surinadi yana o‘rnidan turadi... ana shu zaylda umr hikmatlarini anglaydi... Hayot mag‘zini chaqadi...

Tohir Malikning «Shaytanat» olami haqida hikoya qiluvchi ushbu asari necha yillardan buyon o‘quvchilar e’tirofiga sazovor bo‘lib kelmoqda.

Bu galgi tugal va mukammal nashrda besh qismli kitobning har bir qismi alohida nom ostida taqdim etilgan, asarning o‘zi esa yaxlit, mazmunan va mantiqan yakun topgan ko‘rinishda, barcha tuzatishlar va o‘zgartirishlar kiritilgan holda chop etildi.

Dolg‘ali zamon, adolatsiz jamiyat, og‘ir ijtimoiy muhit tufayli boshiga hayotning turli sinovlari, ayanchli ko‘rguliklari tinimsiz yog‘ilsa-da, insoniy fazilatlaridan batamom mosuvo bo‘lmagan, qalbida or-nomusni saqlab qolgani bilan kitobxonlarning sevimli qahramoniga aylanib ulgurgan Asadbekning hayotida sodir bo‘ladigan voqea va hodisalar mana shu besh qismlik to‘plamda o‘z nihoyasiga yetadi.

Qahramonlarning shaxsiyati va ularning turmush tarzi, xarakter xususiyati, ijtimoiy turmush tarzi bilan bog‘liq keskin va shu bilan bir qatorda kitobxonlar uchun qiziqarli bo‘lgan voqeliklar rivoji o‘tkir syujetli «Shaytanat» asarining asosini tashkil etadi.

«Shaytanat» to‘plamining birinchi qismi «Qasos», ikkinchi qismi «Non bergan jon olmaydi», uchinchi qismi «Semirgan chumoli», to‘rtinchi qismi «Oqqush qo‘shig‘i», beshinchi qismi «Azozil do‘koni» deb nomlandi. Qismlarning har biri alohida nomlangani va har bir qism alohida kitob sifatida nashr etilganligi ham kitobxonlar uchun ayni muddaodir.

Besh qismlik ushbu to‘plamdan o‘rin olgan kitoblar bejirim muqovalar va ichki illyustratsiyalar bilan ziynatlangani, sovg‘abopligi bilan ham avvalgi nashrlardan ajralib turadi.

Shubhasiz ushbu nashr barcha kitobxonlar, xususan detektiv ishqibozlari uchun munosib tuhfa bo‘ladi.