Xiaomi 12 ва Xiaomi 12 Pro флагманларини тақдим этганидан ҳафта ошиб, компания Ҳиндистонга ҳам янги қурилмаларини олиб кирди, ёзмоқда «GSM Arena». Булар орасида энг диққатга сазовори — Xiaomi 11i Hypercharge — бу маҳаллий бозордаги 120 Вт қувватлашга эга илк смартфон.

Xiaomi 11i Hypercharge смартфони экрани — AMOLED, 6,67 дюйм, Full HD, кадрлар частотаси 120 Гц. Платформа — MediaTek Dimensity 920 5G, амалий тизим — Android 11 (MIUI 12.5. интерфейси).

Бармоқларни сканерлаш смартфон корпусининг ён қисмида жойлашган. Фронтал камераси — 16 Мп. Дисплейи тобланган Gorilla Glass 5 ойнаси билан ҳимояланган.

Асосий камераси: бош камера — 108 Мп (Samsung HM2, кенг бурчакли объектив) ҳамда 8 Мп (Samsung S5K4H7, кенг бурчакли объектив) ва 2 Мп (макросуратлар учун) камералар.

Смартфоннинг асосий хусусияти юқорида тилга олинган 120 Вт қувватлагичи, қувватлаш блоки комплект ичида. Унинг ёрдамида 4500 мАс сиғимли аккумулятор атиги 15 дақиқа ичида тўлиқ қувват олади.

Қўшимча хусусиятлари: NFC, наушниклар учун стандарт улангич, инфрақизил датчик, стереодинамика (Dolby Atmos).

Смартфоннинг ўлчамлари — 163,7x76,2x8,3 мм, оғирлиги — 204 грамм. Агарда Xiaomi 11i Hyperchargeнинг хусусиятлари сизга жуда таниш туюлаётган бўлса, ҳайрон қоларли жойи йўқ, чунки бу — 2021 йилнинг октябрида Хитойда тақдим этилган Redmi Note 11 Pro+, номи ўзгартирилган, холос.

Ҳиндистонда Xiaomi 11i Hypercharge учун қуйидаги нархлар белгиланган: 6/128 ГБ — 360 доллар, 8/128 ГБ — 390 доллар.