Месси MLSда Саудия Арабистонида ваъда қилинганидан 10 баравар кам маош олади.

Аввалроқ Лионел Мессига Саудиянинг «Ал-Ҳилол» клубидан икки йил давомида рекорд даражадаги — 1,2 миллиард евролик таклиф ҳақида хабар берилган эди. Бироқ аргентиналик юлдуз ўн баробар кам маошга эга «Интер Маями» вариантини танлади.

Аргентиналик ҳужумчи «Интер Маями»да бир мавсумда 50-60 миллион доллар ишлаб олади.

MLS (АҚШ ва Канада футбол лигалари тизимининг олий дивизиони) раҳбарларидан бири Хорхе Маснинг маълум қилишича, Месси фаолиятини тугатгандан сўнг клубдаги улушини олади, шунингдек, Apple TV орқали трансляция қилиш ҳуқуқи ва Adidas билан ҳомийлик шартномасидан тўловлар фоизига эга бўлади.

«Бу ерда футбол тарихида иккита катта воқеа бўлган: Пеленинг «Нью-Йорк Космос»га келиши [1975 йилда] ва 2007 йилда Девид Бекхемнинг «Лос-Анджелес Гэлакси»га ўтиши. Месси чемпионатни янги босқичга олиб чиқади. Ўйлайманки, у ўз изини қолдирмоқчи», — дейди Мас.

Унга кўра, аргентиналик «MLSни дунёнинг икки ёки учта энг йирик лигаларидан бирига айлантира олади». Мас, шунингдек, Мессини қўлга киритиш бўйича музокаралар уч йилдан буён давом этаётгани ва асосий нуқталардан бири Apple TV билан келишув бўлганини таъкидлади.

36 ёшли Месси июн ойида ПСЖни тарк этиб, Бекхемга тегишли бўлган «Интер Маями»га ўтди.

2022 йилги жаҳон чемпиони ва етти карра «Олтин тўп» соҳибига «Барселона» ва Саудия Арабистонининг «Ал-Ҳилол» клублари ҳам даъвогарлик қилишганди.

Месси янги клубидаги дебют учрашувини 21 июл куни ўтказиши кутилмоқда.