Messi MLSda Saudiya Arabistonida va’da qilinganidan 10 baravar kam maosh oladi.

Avvalroq Lionel Messiga Saudiyaning «Al-Hilol» klubidan ikki yil davomida rekord darajadagi — 1,2 milliard yevrolik taklif haqida xabar berilgan edi. Biroq argentinalik yulduz o‘n barobar kam maoshga ega «Inter Mayami» variantini tanladi.

Argentinalik hujumchi «Inter Mayami»da bir mavsumda 50-60 million dollar ishlab oladi.

MLS (AQSh va Kanada futbol ligalari tizimining oliy divizioni) rahbarlaridan biri Xorxe Masning ma’lum qilishicha, Messi faoliyatini tugatgandan so‘ng klubdagi ulushini oladi, shuningdek, Apple TV orqali translyasiya qilish huquqi va Adidas bilan homiylik shartnomasidan to‘lovlar foiziga ega bo‘ladi.

«Bu yerda futbol tarixida ikkita katta voqea bo‘lgan: Pelening «Nyu-York Kosmos»ga kelishi [1975 йилда] va 2007 yilda Devid Bekxemning «Los-Andjeles Gelaksi»ga o‘tishi. Messi chempionatni yangi bosqichga olib chiqadi. O‘ylaymanki, u o‘z izini qoldirmoqchi», — deydi Mas.

Unga ko‘ra, argentinalik «MLSni dunyoning ikki yoki uchta eng yirik ligalaridan biriga aylantira oladi». Mas, shuningdek, Messini qo‘lga kiritish bo‘yicha muzokaralar uch yildan buyon davom etayotgani va asosiy nuqtalardan biri Apple TV bilan kelishuv bo‘lganini ta’kidladi.

36 yoshli Messi iyun oyida PSJni tark etib, Bekxemga tegishli bo‘lgan «Inter Mayami»ga o‘tdi.

2022 yilgi jahon chempioni va yetti karra «Oltin to‘p» sohibiga «Barselona» va Saudiya Arabistonining «Al-Hilol» klublari ham da’vogarlik qilishgandi.

Messi yangi klubidagi debyut uchrashuvini 21 iyul kuni o‘tkazishi kutilmoqda.