29 ноябр куни жаҳон футболидаги энг нуфузли совринлардан бири «Олтин тўп» топширилади. Бу шарафга ким кўпроқ лойиқ?

Бугун Парижда соврин эгаси эълон қилинади. Бу йилги пойгада ким қандай имкониятга эга? Қуйида шу ҳақда гаплашамиз.

10. Кевин Де Брёйне (Манчестер Сити)

«Белгиялик «тилла болакай» «Олтин тўп»га кўп маротаба энг яқин кела олган футболчилардан саналади. 2021 йилда 14 гол, 16 голли узатма қайд этди. Премьер-лига ва Карабао кубогида ғолиб чиқди.

«Манчестер Сити» яримҳимоячиси Кевин Де Брёйне инглиз ва эҳтимол Европа футболидаги ажойиб креатив ўйинчилардан бўлиб қолмоқда. Белгиялик 2021 йилда жароҳатлар сабаб ўйин амалиётига кам эга бўлишига қарамай, шахсий кўрсатгичлар бўйича яхши натижалар кўрсатмоқда.

9. Криштиану Роналду («Ювентус»/«Манчестер Юнайтед»)

2021 йилда 43 та гол, 6 та голли узатма қайд этган Роналду сўнгги йилларда «Олтин тўп»нинг кучли учлигига кира олмаяпти. Италия кубоги ва Италия суперкубогида ғолиб чиқди. Евро-2020 мусобақасида 5 та гол билан энг яхши тўпурар бўлди. Терма жамоа сафида энг кўп гол (115 та) урган футболчига айланди. Бундан ташқари А Сериянинг энг яхши тўпурари ҳам бўлди.

8. Эрлинг Холанд («Боруссия Дортмунд»)

2021 йилда 45 гол, 13 голли узатма қайд этган норвег ўзи иштирок этган ҳар қандай мусобақада гол уришни уддаламоқда. Бундеслигада 50 ўйинда 50 та гол урди. Тарихда ҳеч қайси футболчи бунчалик тез бунга эришмаган. Эрлингнинг битта камчилиги тез жараҳот олиши бўлса ажабмас. Агар Ҳоланд камроқ жароҳатлар олганда эҳтимол натижаси бундан яхшироқ бўлармиди(?).

7. Ромелу Лукаку («Интер»/«Челси»)

2021 йилда 30 та гол, 8 та голли узатма қайд этган яна бир белгиялик ўтган мавсумда жуда яхши натижалар қайд этди. Ромелу Лукакунинг «Челси»даги карьераси жуда омадли деб бўлмаса ҳам, белгиялик футболчининг ўтган мавсумда «Интер» билан қилган ишлари ҳавас қиларли.

6. Килиан Мбаппе («Пари Сен-Жермен»)

2021 йилда 45 гол, 22 голли узатма қайд этган француз УЕФА Миллатлар Лигаси ва Франция Кубогида ғолиб чиқди. Килиан катта жамоалар билан ўйинларда ҳам ўзини кўрсатди. Евро-2020 мусобақасида нимчорак финалда Швейцария дарвозасига пеналтидан гол уролмади ва жамоанинг юришини тўхтатишига сабаб бўлди. Мбаппе «Реал Мадрид»га ўтиш машмашаси фонида ўйини пасайганга ўхшамоқда, аммо футболчининг потенциали юқорилигича қолмоқда.

5. Карим Бензема («Реал Мадрид»)

2021 йилда 43 гол, 14 голли узатма амалга оширган яна бир француз Карим Бензима УЕФА Миллатлар лигасида ғолиб чиқди. Карим Бензема Криштиану Роналду «Реал Мадрид»ни тарк этганидан кейин кучайишда давом этмоқда ва 2021 йил унинг фаолиятидаги энг яхши индивидуал йил бўлди. Классик «тўққизлик» ролини қойиллатиб бажараётган Бензема Франция терма жамоасига қайта чақириқ олди ва Мадридда энг муҳим футболчи бўлмоқда.

4.Нголо Канте («Челси»)

2021 йилда Чемпионлар лигаси ва УЕФА Суперкубоги, УЕФА Миллатлар лигасини қўлга киритди. Чемпионлар лигаси финалидаги энг яхши ўйинчи, шунингдек, «Реал Мадрид» устидан қозонилган ғалабанинг иккала ўйинида ҳам жуда яхши ҳаракат қилган эди. Камтар Кантени «Олтин тўп»га лойиқ футболчи дейишимиз мумкин.

3. Жоржиньо (Челси)

2021 йилда 9 та гол, 3 та голли узатма, Евро-2020, Чемпионлар Лигаси ва УЕФА Суперкубогида ғолиб чиқди. Жоржиньо яқин йилларда «Олтин тўп» ТОП учлигига кира олган Буффондан кейинги футболчи.

2. Лионел Месси («Барселона» / «Пари Сен-Жермен»)

2021 йилда 41 гол, 17 голли узатма қайд этган Месси биринчи маротаба терма жамоада соврин ютди. Америка кубогининг (Копа Америка) қўлга киритилишида Месси катта ҳисса қўшди. Бундан ташқари Месси «Олтин тўп»нинг ватани Францияга кўчиб ўтган.

1. Роберт Левандовски («Бавария»)

2021 йилда 64 гол, 10 та узатма амалга оширган полшалик Роерт Леван«гол»иски Бундеслига, клублар ўртасидаги жаҳон чемпионати ва ДФЛ-Суперкубогида ғолиб чиқди.

Агар «France Football» баҳсли тарзда бекор қилмаганида, Роберт Левандовски 2020 йилда «Олтин тўп»ни қўлга киритган бўлар эди.

«Бавария» юлдузи, шубҳасиз, икки мавсумни қўшганда битта «Олтин тўп» лойиқ деб ҳисоблашимиз мумкин. Роберт замонавий футболдаги камдан кам классик тўққизлик ҳужумчилардан ҳисобланади.

Полшалик бугун «Олтин тўп»ни қўлга кирита оладими, нима деб ўйлайсиз?