Луис Энрикенинг «Барселона»даги собиқ ёрдамчиси ҳамда «Сельта» клубининг собиқ бош мураббийи Хуан Карлос Унсуэ тузалиб бўлмас дардга чалингани ҳақида «Marca» хабар берди.

53 ёшли мутахассисга ён томонлама амиотрофик склероз ташхиси қўйилган. Бу хасталик вақт ўтиши билан мушакларнинг емирилиши ва шолга олиб келади.

«Тўрт йил умрим қолганини айтишди. Бундай касалликка чалинган бошқа беморлар билан гаплашдим. Улар барча қийинчиликларга қарамай, яшашни жуда исташяпти», — деди Унсуэ.

Унсуэ футболчилик фаолиятида дарвозабон бўлган. Аввал «Осасуна»да ўйнаган, кейин «Барселона»га келиб, Андони Субисарретанинг дублёри бўлган. Бир неча мавсумдан сўнг «Севилья»га ўтиб, Ла Лигада 222 ўйин ўтказган. Кейин «Тенерифе» ва «Овьедо»да ўйнаган, фаолиятини 2003 йилда «Осасуна»да тугатган.

Мураббийлик фаолиятини эса дарвозабонлар мураббийи сифатида «Барселона»да бошлаган — аввалига Франк Райкаард, сўнг Пеп Гвардиола қўл остида. Кейин «Нумансия», яна «Барселона», «Расинг»...

«Сельта»да Луис Энрикега кўмаклашган Унсуэ кейинчалик у билан «Барселона»га қайтиб, кўплаб совринларни қўлга киритди. Хусусан, 2014/2015 мавсумидаги треблни. Хуан Карлос «Барселона» бош мураббийи бўлиши ҳам кутилаётганди, бироқ якунда клуб Эрнесто Вальвердени олиб келди. Бу ердан кетган Унсуэ «Сельта»ни бошқарди. Унинг сўнгги клуби Каталониянинг «Жирона»си бўлди.