Хитойда балиқ етиштириладиган улкан кема қурилмоқда
Хитойда лосос балиғини етиштиришга мўлжалланган дунёдаги илк кема қурилмоқда. Сузувчи балиқчилик фермаси буюртмачига июн ойида топширилади.
Узунлиги 250 метрга яқин Su Hai №1 кемаси Гуанчжоудаги Huangpu Wenchong Shipyard верфида қурилмоқда.
Лойиҳа қиймати — 600 млн юан (83,6 млн АҚШ доллари атрофида). Кема учун буюртма берган Jiangsu Lianshen Marine Technology компанияси маълумотига кўра, сузувчи фермада йилига 8 000 тоннагача лосос етиштирилади.
Анъанавий денгиз балиқчилик фермаларидан фарқи, кема тайфун ёки зарар етказувчи сув ўтларининг гуллаш пайтида хавфсиз жойга кўча олади. Бундан ташқари, қайта ишлаш ускуналари кеманинг ўзида жойлашган.
Хитой лососнинг 80 фоизини четдан келтиради, 2023 йилда Норвегия ва Чилидан 100 минг тоннадан ортиқ лосос импорт қилинган. 2030 йилда импорт ҳажми 200 минг тоннага етиши кутиляпти. Сариқ денгизда ушбу кеманинг фаолияти йўлга қўйилишидан мақсад ички талабни қоплашга қаратилган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter