АҚШ президенти Доналд Трамп Украинага ҳарбий ёрдамни мамлакат раҳбарияти «тинчлик тарафдори» эканлигини намойиш қилмагунча музлатиб қўйишни буюрди. Бу Оқ уйнинг Овал кабинетида Трампнинг Украина президенти Володимир Зеленский билан даҳанаки тортишувидан бир неча кун ўтиб содир бўлди.

«Президент Трамп тинчлик тарафдори эканини очиқ айтди. Ҳамкорларимиз ҳам бу мақсад сари интилиши керак. Биз ёрдамимизни тўхтатиб, муаммони ҳал қилишда ёрдам бераётганига ишонч ҳосил қилиш учун кўриб чиқяпмиз», – деди Оқ уй вакили.

Трампнинг ўзи бу қарорга ҳозирча изоҳ бермади, Оқ уйдан ҳам расмий маълумот олинмади.

Душанба куни «Украинага ҳарбий ёрдамни тўхтатадими?» деган саволга Трамп «Нима бўлишини кейин кўрамиз», деганди.

Bloomberg ва Fox News’нинг хабар беришича, танаффус Трамп Украина раҳбарияти тинчликка интилаётганига ишонч ҳосил қилмагунча давом этади.

«Қўшма Штатлар Украинага жорий қилинган барча ҳарбий ёрдамни Трамп мамлакат раҳбарлари тинчликка интилиш мажбуриятини намойиш этаётганидан қониқмагунча тўхтатиб қўяди», – дея Оқ уй матбуот котибининг сўзларидан иқтибос келтиради Bloomberg.

«Бу ёрдамнинг доимий муддатга тўхтатилиши эмас, бу вақтинча танаффус», – дея хабар беради Fox News маъмурият ходимига таяниб.

Bloomberg агентлигининг аниқлик киритишича, бу қарор Украинага етказилмаган барча Америка ҳарбий техникаларига, жумладан, транзитда бўлган ёки Польша орқали транзитни кутаётган қуролларга ҳам таъсир қилади.

Трампнинг қарори Киевга қурол етказиб беришга аниқ қандай таъсир қилиши ва қанча бирликларга таъсир қилиши ҳозирча номаълум.

CNN эса АҚШ расмийларига таяниб, Оқ уй Зеленскийдан тоғ-кон қазилма бойликлар бўйича келишув ёки ҳарбий ёрдам муҳокамаси бўйича олдинга силжишдан олдин, эҳтимол, омма олдида узр сўрашни талаб қилаётганини хабар қилди.

Телекомпания манбаларидан бирига кўра, ҳарбий ёрдамни тўхтатиш қарори душанба куни кечга яқин қабул қилинган ва бу «Украинага босим стратегияси»дир.

Зеленский аллақачон Трампдан жума куни Овал кабинетда содир бўлган воқеа учун кечирим сўраш ниятида эмаслигини, аммо АҚШ билан муносабатларни давом эттиришга тайёрлигини айтган. Шунингдек, у Украина расмийлари тинчлик тарафдори ва урушни имкон қадар тезроқ тугатишга интилаётганини қайта-қайта таъкидламоқда.