АҚШ президенти Доналд Трамп Россия президенти Владимир Путинни кескин танқид қилди.

Дам олиш кунлари Россия Украинага юзлаб ракета ва дрон билан ҳужум уюштирди. Сўнгги ойларда кузатилган энг йирик ҳаво ҳужумида камида 12 украиналик ҳалок бўлган. Бу ҳол Трампга маъқул келмаган.

“Мен Путин қилаётган ишлардан норозиман. У кўплаб одамларни ўлдирмоқда. Билмадим, Путинга нима жин урди. Мен уни анчадан буён биламан. Ҳамиша у билан тил топишганман. Аммо (Украина) шаҳарларига ракета отиб, одамларни ўлдирмоқда. Бу эса менга ҳечам ёқмаяпти”, – деган Трамп Морристаун аэропортида.

У Россияга қарши санкцияларни кучайтириши эҳтимолидан ҳам гап очган.

Трамп Путинни Truth Social платформасида ҳам танқид қилган.

“Россия президенти Владимир Путин билан ҳамиша яхши муносабатда бўлганман. Аммо энди унга нимадир бўлган кўринади. У ақлдан озибди! У одамларни бекордан-бекор ўлдиряпти. Мен фақат аскарларни айтмаяпман. Ракета ва дронлар Украина шаҳарларига ҳеч бир сабабсиз талафот етказмоқда”, – деб ёзган АҚШ президенти.

Трампнинг фикрича, Путин бутун Украина ҳудудини эгаллашга ҳаракат қилса, Россия фалокатга юз тутади.

АҚШ етакчиси, одатига кўра, Украина президенти Владимир Зеленскийни ҳам танқид қилишни эсдан чиқармаган.

Президентлик сайлови даврида Россия – Украина урушини 24 соат ичида тугатишга ваъда берган Трамп Оқ уйга келганидан буён Путин билан бир неча бор телефонда суҳбатлашди.

Таҳлилчиларга кўра, Кремль Оқ уй таклиф этаётган тинчлик битимини қабул қилмай, турли-туман шартларни илгари сураётгани ва вақтни чўзаётгани сабаб Трампнинг Путиндан ҳафсаласи пир бўлмоқда.

Трамп аввалроқ Путиннинг Зеленский ҳокимияти легитимлигини шубҳа остига олганидан дарғазаб бўлганди.