Доналд Трамп АҚШ президенти курсисида ўтирганига 30 апрел куни, яъни бугун роппа-роса 100 кун тўлади.

Овал кабинетдаги «асал ойи» «жуда зўр» ўтди — республикачи президентнинг ўзи шундай фикрда. Бироқ шунча жўшқин фаолиятига қарамасдан, Трампни қўллаб-қувватлаш рейтинги қуйилашда давом этмоқда, деб ёмоқда Америка матбуоти.

Америка анъаналарига кўра, Оқ уй раҳбарининг илк юз кунлиги ўзига хос «асал ойи» ҳисобланади. Бу даврда томонлар (президент ва унинг мухолифлари) бир-бирларини «аяшади».

Трамп фаолиятининг илк кунидан то 29 апрел тонгига қадар 139 та қарор-фармонни имзолади. Янги ва ва мутлақ рекорд! Унгача АҚШ президентлари рекордчиси Франклин Рузвелт эди — илк юз кунликда деярли ҳар куни ёки жами 99 та ҳужжатга қўл қўйган. Давлат раҳбарининг илк натижаларини ҳисоблаш учун юз кунлик ўлчов айнан Рузвелтдан бошланган.

Трампнинг баъзи фармонлари анчайин ғаройиб: Мексика кўрфазини Американики қилиб ўзгартиришдан тортиб пенни (1 центлик танга)ни зарб этишни тўхтатиш ёки Американи «буюкликка қайтариш»гача. Камига у учинчи муддатга қолиш ҳақида ҳозирдан бош қотирмоқда.

Ўтган 100 кунлик яна шуниси билан ҳам эътиборлики, Доналд Трамп Россия-Украина урушини худди шу давр — сиёсий рақиблари энг кам қаршилик кўрсатадиган паллада ҳал қилиши кутилаётган эди. Ҳозирча натижасини кўрмадик, аммо келаётган ҳафта муҳим воқеаларга бой бўлиши бот-бот такрорланяптики, нималардандир умид қилса бўлади.