Жанубий Кореянинг собиқ президенти Мун Чжэ Инга нисбатан порахўрлик жинояти бўйича айблов эълон қилинди.

2017-2022 йилларда Жанубий Кореяга раҳбарлик қилган сиёсатчи президентлик даврида куёви учун жорий этилган сохта лавозим орқали ноқонуний равишда даромад олишда айбланмоқда.

Тергов идорасига кўра, Мун Чжэ Ин “Eastar Jet” ширкати асосчиси Ли Сан Чжикдан 217 миллион вон (133239 евро) миқдорида пора олган. Собиқ президентнинг куёви 2018-2020 йилларда ширкатдан айни шу миқдорда маош ва бошқа рағбат пулларини олган. Прокурорлар бу собиқ президентга куёви орқали берилган пора деб ҳисобламоқда.

Қайд этилишича, собиқ президентнинг куёви гарчи авиация соҳасида иш тажрибасига эга бўлмаса ҳам, “Eastar Jet” авиаширкатига ижрочи директор сифатида ишга қабул қилинган. Кейинроқ ширкат асосчиси Ли Сан Чжик кичик ва ўрта корхоналарни қўллаб-қувватлаш бўйича давлат агентлигига раҳбар этиб тайинланган ҳамда Мун Чжэ Ин партиясидан парламент депутатлигига номзод қилиб кўрсатилган.

Собиқ президентга қарши айблов 3 июнь куни президентлик сайлови ўтиши арафасида илгари сурилмоқда. Шунга кўра Мун Чжэ Иннинг тарафдорлари пора айблови либералларнинг собиқ етакчисини сайлов арафасида обрўсизлантириш учун қўйилганини айтмоқда.

Жанубий Кореянинг кўплаб собиқ президентлари турли айбловлар билан қамоққа олинган.
2022 йил 10 майдан Жанубий Кореяни идора этиб келган Юн Сок Ёл мамлакатда ҳарбий ҳолат эълон қилишга муваффақиятсиз уриниши ортидан жорий йил апрель ойида давлат раҳбари лавозимидан четлатилди.

Юн Сок Ёлга жиноий жавобгарлик таҳдид солмоқда.

2013-2017 йилларда президент лавозимида фаолият юритган Пак Кин Хе ҳам ваколат муддатини охирига етказа олмаган. Коррупцияда айбланган собиқ аёл президентга суд 24 йил қамоқ жазоси тайинлаган. 2021 йил декабрь ойида у соғлиғиҳисобга олинган ҳолда, инсонпарварлик тамойилларига асосан афв этилган.

2008-2013 йилларда президент лавозимида фаолият юритган Ли Мён Бак ҳам пора олиш ва маблағ ўзлаштиришда айбланиб 17 йил қамоққа ҳукм қилинганди.