Ўзбекистон ташқи ишлар вазирлиги Ямандаги уруш бўйича баёнот берди.

«Ўзбекистон Республикаси Яманда БМТ воситачилигида икки ойлик сулҳ ва ўт очишни тўхтатиш эълон қилинганини олқишлайди.

Ҳарбий ҳаракатларга вақтинчалик мораторий, шунингдек, ушбу мамлакатда қонунийликни таъминлаш учун кўрсатилган қатъият Яманда кенг қамровли тинчлик ва барқарорликни ўрнатиш йўлида муросага эришиш учун зарур шарт-шароитларни яратади деб ҳисоблаймиз.

Биз барча курашаётган томонларни ихтилофни мулоқот ва дипломатик йўл билан ҳал қилиш учун вазмин бўлишга ва сиёсий ирода кўрсатишга чорлаймиз», дейилади баёнотда.

Яман сулҳи

Ямандаги ҳусий исёнчилари ва ҳукумат кучлари ўт очишни тўхтатишга келишганди. Рамазони шариф муносабати билан эришилган сулҳ 2 ой давом этишини БМТнинг Яман бўйича махсус вакили Ҳанс Грундберг маълум қилганди.

Қайд этилишича, бир-бирига мухолиф бўлган икки томон ҳаво, ер ва денгизда ҳужум амалиётларини тўхтатиб туришга рози бўлган.

«Муваққат сулҳ битимидан кўзланган мақсад зулму зўравонлик домида қолган яманликларга тин олмоқ учун имкон бериш, мушкулларни осон қилиш, энг асосийси, ушбу зиддият барҳам топишига умид уйғотишдан иборатдир», — деди Ҳанс Грундберг. 

БМТ махсус вакили, шунингдек, томонлар ўртасида сиёсий мулоқотни кучайтириш орқали ҳарбий зиддиятга буткул барҳам бериш режалаштирилаётганини маълум қилган.

Муваққат битим АҚШ ва Буюк Британия томонидан олқишланган.

«Бу — муҳим қадам, албатта, аммо ҳали етарли эмас. Ўт очишни тўхтатиш битимига қатъий риоя этилиши керак. Аввал ҳам таъкидлаганимдек, ушбу урушга имкон қадар тезроқ якун ясамоқ лозим», — деган АҚШ президенти Жо Байден.

Эрон қўллаб-қувватлаётган ҳусийлар ҳамда Саудия Арабистони кўмак кўрсатаётган ҳукумат кучлари ўртасидаги ҳарбий зиддият 2014 йилдан буён давом этмоқда. Ўша йили ҳусийлар пойтахт Сана шаҳрини эгаллаб, президент Абд Раббу Мансур Ҳодийни ҳокимиятдан четлатган эди. 2015 йил март ойида эса Саудия Арабистон ва БАА бошчилигидаги ҳарбий коалиция Ҳодий маъмуриятини тиклаш учун амалиёт бошлади.

8 йиллик қонли уруш гуманитар инқирозга олиб келди. Ҳарбий тўқнашувларда 150 минг киши, жумладан, 14 500 нафар тинч аҳоли вакили ҳалок бўлди.  БМТ Ямандаги гуманитар ҳолатни жуда оғир деб баҳоламоқда.