Тошкент - Самарқанд йўналишида киракашлик билан шуғулланувчи Яшин исмли шахс соат 19.30лар атрофида ўзига тегишли бўлган оқ рангли «Ласетти» автомобилида одатдагидек мижоз кутиб турар эди. Шу вақт унинг ёнига Қозоғистонда ишлаб қайтаётган ҳамқишлоғи Шокир келади. Бу ҳақда ИИББ матбуот хизмати хабар бериб ўтди.

Шокир Самарқандга кетиш истагини билдиради. Ҳамқишлоғи маст ҳолатда эканига эътибор бермаган Яшин унга машина ичида кутиб ўтиришни таклиф қилади. Шокир эса ўзининг айтиши бўйича «кафеда 300 грамм ароқ ичиб, овқат еган ва яна бир ярим литрлик баклашкада пиво ҳам солдириб олган» эди. У калитни бурайди ва машинани олиб қочиб кетади.

Шокирнинг айтишича, у ичиб олса икки-уч кун ўзига кела олмайди, «томи кетиб қолади». Хуллас, ўзига келганда Сирдарёга етган экан. Шу ерда у қўлга олинади.

Шокир алкоголли ичимлик истеъмол қилганидан жуда пушаймон. Аммо қанча аттанг қилмасин, қонун ҳамма учун баробар. Айни вақтда унга нисбатан қамоқ эхтиёт чораси қўлланган ва тергов ҳаракатлари давом этмоқда.