Ирландиялик UFC жангчиси Конор Макгрегор Ирландия президентлигига номзодини қўйишни режалаштирмоқда. Бу ҳақда у ўзининг X тармоғидаги саҳифасида маълум қилди.

Конор шу йил охирида Ирландия президентлиги учун курашади.

Спортчи аллақачон Европа Иттифоқига миграция ва унинг парламентдаги ташаббуслари ҳақида гапирган.

«Ирландия, танлов сизники. Менга овоз беринг ва биз биргаликда ватанни қутқарамиз!

Ирландия 2026 йил 12 июнгача ЕИ миграция пактини тўлиқ амалга ошириши керак, бу эса харажатларни қайта тақсимлашга, бошпана ва хавфсизлик тартиб-қоидаларини ислоҳ қилишга олиб келади», — деб ёзади у.

Ирландияда президент сайлови 2025 йил 11 ноябргача бўлиб ўтиши керак.

Маълумот учун: Европа Иттифоқининг миграция пакти 2024 йил май ойида тасдиқланган бўлиб, Евроиттифоқ мамлакатларида икки йил муддат амал қилади. Пакт уларни маълум миқдордаги бошпана изловчиларни қабул қилишга мажбур қилади ва агар улар рад этилса, мамлакатлар муҳожирларни қабул қилувчиларга уларни жойлаштириш учун воситалар билан ёрдам беришлари керак бўлади.

Ирландия 2026 йил 12 июнгача Европа Иттифоқининг миграция пактига риоя қилиши керак. Макгрегор эса бу масалани референдумга қўйиш керак, деб ҳисоблайди.

«Мендан бошқа ким ҳукуматга қарши чиқади? Улар илгари сурмоқчи бўлган бошқа номзодлар уларга бас келолмайди. Лекин мен қиламан! Президент сифатида мен бу қонун лойиҳасини референдумга қўйган бўлардим. Гарчи мен бу пактга кескин қарши бўлсам ҳам, бу менга ёки ҳукуматга боғлиқ эмас», — деб ёзди у ўзининг Х аккаунтида.

Конор Макгрегор 36 ёшда ва UFCнинг ярим енгил (-66 кг) ва енгил (-70 кг) вазнларида икки карра чемпион. Унинг ҳисобида 22 ғалаба ва 6 та мағлубият бор.