«SpaceX» ва «Tesla» компаниялари раҳбари Илон Маскнинг бойлиги бир кунда 8,8 миллиард долларга камайди. Натижада миллиардер сайёрамизнинг энг бой одамлари рўйхатида учинчи ўринга тушиб қолди. Буни «Forbes» маълумотлари тасдиқлайди.

Бунгача Маск 9 декабрда кўтарилиб олган рейтингнинг иккинчи поғонасини эгаллаб келаётганди. Шунингдек, у Bloomberg Billionaires Index (BBI) агентлиги рейтингида ҳам худди шу ўринни банд этган.

«Forbes» маълумотларига кўра, Маскнинг бойлиги қарийб 145 миллиард долларга баҳоланмоқда. Шу билан бирга, «Forbes» рўйхатининг биринчи ўрнини эгаллаган «Amazon» асосчиси ва раҳбари Жефф Безоснинг бойлиги 187 миллиард долларни, «Louis Vuitton Moët Hennessy» компанияси президенти Бернар Арно (рейтингда иккинчи ўрин)нинг бойлиги 145,6 миллиард долларни ташкил этади.

Маск «Tesla» акцияларининг тахминан бешдан бирига эгалик қилади. Жорий йил бошидан буён улар 8 баравар ошди. Шу тариқа, акцияларнинг қиймати S&P 500 индексига киритилиши ҳақида эълон қилинган 17 ноябрдан бошлаб кўтарилган.

Компания акцияларининг пасайишига кўтарилгандан кейинги тузатиш ва коронавирус инфекциясининг янги штамми тўғрисидаги маълумот сабаб бўлди.