Исроил ХАМАСни гаровга олинганларга ёмон муносабатда бўлганликда ҳамда ҳаракат аъзолари ўтган сафар гаровдаги Шири Бибаснинг ўрнига номаълум аёлнинг жасадини қайтариб берганликда айблаган эди.

Исроил ва ҲАМАС 26 февралга ўтар кечаси Миср воситачилигида исроиллик гаровга олинган тўрт кишининг жасадини 602 нафар фаластинлик маҳбусларга алмашиш бўйича келишувга эришганини, бу эса бузилиш хавфи остида қолган сулҳни сақлаб қолгани маълум қилинди.

Исроил ўтган ҳафта охирига режалаштирилган 600 маҳбусни озод қилиш амалиётини ҲАМАСнинг гаровга олинганларни топшириш маросимида уларга нисбатан «қўпол муносабатда бўлаётгани»га норозилик сифатида кечиктирган эди.

ҲАМАС эса ушбу кечиктиришни шу ҳафта охирида иккинчи босқичига кириши керак бўлган сулҳнинг «жиддий бузилиши» деб атади.

Бироқ ҳозирда ҲАМАС ва, The Times of Israel нашрига кўра, исроиллик расмий можарони ҳал қилиш бўйича келишувга эришилганини маълум қилди. 

ҲАМАС фаластинлик маҳбуслар топширилиши исроиллик гаровга олинганларнинг жасадлари топширилиши билан бир вақтда амалга оширилишини билдирди. Алмашинув чоршанба куни бўлиб ўтади.

Бугунги алмашинув томонларнинг ўт очишни тўхтатишнинг биринчи босқичидаги мажбуриятларини якунлайди ва Исроил қўшинларини Ғазо секторидан тўлиқ олиб чиқиш бўйича музокараларни ўз ичига олган иккинчи босқичга йўл очади.